Lalis sa tigbakay, lalaki gidunggab og tari patay

CEBU, Philippines —  Patay ang usa ka lalaki human gidunggab og tari sa manok sa iyang gikalalis sa tigbakay niadtong Domingo sa gabii diha sa Barangay Sambag Uno sa Dakbayan sa Sugbo.

Ang biktima giila nga si Bibiano Tohoy Tautuan, 30, residente sa 195 P. del Rosario Extension sa mao gihapong barangay. Ang gitumbok nga nidunggab kaniya mao si Brendo Cabaral Cabido, nga iyaha rang silingan. Ang asawa sa biktima nga si Aisa Tautuan nga nakasaksi sa krimen mi-report sa mga opisyal sa Police Station 4 sa Abellana Police Station nga ang iyang bana ug ang suspek naglalis bahin sa sabong.

Dunay nahitabong komosyon ug didto nadunggaban ang biktima sa suspek gamit ang tari sa manok.

Ang biktima gidali pagdala sa Cebu City Medical Center apan gideklarar nga dead on arrival sa nag-asikaso kaniya nga doktor.

Ang kapolisan padayon pa karong naghimo og hot pursuit operation batok sa maong suspek. (IBM) (BANATNEWS)