80 ka dengue sa 2 ka semana sa Talisay

CEBU, Philippines — Sulod sa duha lang ka semana, 80 ka kaso sa dengue ang natala sa Siyudad sa Talisay.

Gumikan niini niabot na sa 445 sugod sa buwan sa Enero hangtud sa niaging semana diin ang pagtaas sa kaso sa dengue sa niaging tuig ug karon niabot na sa 50 porsyento ang pagsaka.

Usa lang ang natala nga nakalas sa maong sakit sa niaging tuig apan karon nakatala na og duha ang namatay bisan wala pa matapos ang tuig.

Ang labing uwahing biktima mao ang 3-anyos nga taga Barangay Linao.

Si Dr. Lino Alanzado, pangulo sa City Health Office, nagkanayon nga ilang pagduda mao ang kasagingan ug kasagbutan sa luyo sa ilang panimaye.

Asoy pa niya nga dili lang pagpaaso ug misting ang ilang buhaton karon kun dili hingusgan pa gyud ang search and destroy operation.

Siya nagkanayon nga ang pakigbatok sa makamatay nga sakit mao ang pagbungkag sa ilang posibleng itlogan aron dili na sila modaghan.

Naa na sa ikalima ang Siyudad sa Talisay sa dunay daghang kaso sa dengue sa tibuok Rehiyon 7. (/GMR)(BANATNEWS)