Transport strike karong lunes

CEBU, Philippines – Gikatakda nga molusad og nationwide strike ang mga dagkung transport groups karong Lunes.

Kini pasiugdahan sa Alliance of Concerned Transport Organization (ACTO) ug Pinagkaisang Samahan ng mga Tsuper at Operators Nationwide (PISTON).

Tuyo niini ang pagsupak sa pagpapas sa mga Jeepneys ug UV Express Service vehicles sunod tuig isip kabahin sa Public Utility Vehicle Modernization Program sa kagamhanan.

Nunot niini, ang direktor sa Land Transportation Franchising and Regulatory Board 7 nga si Eduardo Montealto Jr., niingon nga duna sila’y contingency plan nga giandam kun pananglitan madayon ang strike.

Nagpahimangno na sab sila sa mga grupo nga moapil sa strike ilabi na kadtong mga public utility jeepneys nga unta dili sila moapil tungod kay mag-atubang sila og reklamo ug mapahamtangan og silot sama sa pagkanselar sa ilang prangkisa.

Si Montealto niingon nga duna silay koordinasyon sa ubang ahensiya sa gobiyerno aron maseguro nga wala’y kasamok nga motumaw sa strike.

Panghinaut ni Montealto nga dili hilabtan kadtong mga dili gustong moapil sa strike.

Buot sa LTFRB-7 nga dili nalang moapil ang transport groups sa strike tungod kay mapwerhisyo man ang mga sumasakay. (/GMR)(BANAT NEWS)