Message sa cellphone sa negosyanteng gipatay nabasa na
CEBU, Philippines – Giimbestigar na sa kapolisan ang duha ka persons of interest nga gituohan nga luyo sa pagpatay sa negosyante nga si Jeffrey Gomotin pipila ka metros gikan sa Mabolo Police Station niadtong Domingo sa gabii. Ang cellphone sa biktima ang naabli na sa kapolisan nga maoy naggiya kanila aron mailhan pinaagi sa text messages sa iyang duha ka kauban sa negosyo sa wala pa ang pagpang-ambush.
“Imposible kaayo og wala siya kahibawo og kinsa siya, kung ikaw mismo kahibawo ka nga gihimo kang persons of interest ug tarung ka nga tawo, mangita kag paagi nga limpyohan imong ngalan,” matud ni Police Captain Dexter Basirgo, hepe sa Mabolo Police Station.
“Karon sige ta og contact sa mga persons of interest, atong gi-trace asa ang exact location, probably later on, mopakita nato, ug masubay gyud nato, ug kinsay mamumuno sa biktima,” dugang ni Basirgo.
Gipadayag ni Basirgo nga base sa ilang nabasahan nga mga text messages ni Gomotin sa wala pa siya namatay, naa taliwala sa duha nga giila nga mga kauban sa negosyo ang giisip karon nga mga tawo nga person of interest sa pagpatay kinsa usa kanila giingong temporaryong nagpuyo sa Sugbo.
Gitan-aw karon sa kapolisan ang kalabutan sa negosyo ang motibo sa pagpatay.
“Ang among gitan-aw, tungod sa usa ka kasosyo niya dunay dakung utang,” matud ni Basirgo base sa text messages sa cellphone ni Gomotin.
“Basin nairita gyud sa iya ug paningil kay ang naa sa communication sa cellphone is paningil. Unya naay usa nga naay gi-issue nga tseke nga talbog. So mao nay usa sa atong mga gisubay,” dugang ni Basirgo. (/GMR)(BANAT NEWS)
- Latest
