7 sakop sa CTMS positibo sa drug test

CEBU, Philippines – Pito ka sakop sa City Traffic Management System ang nagpositibo sa kinalit nga drug-test nga gipahigayon sa City of Lapu-Lapu Office for Substance Abuse Prevention niadtong Lunes.

Usa kanila ang giingong nieskapo ug wala mopaubos sa drug-test.

Matud sa pangulo sa C-LOSAP, Garry Lao, nga nipahigayon sila og kinalit nga drug test sa 242 ka sakop diin 239 lang ang na-drug test tungod kay ang tulo absent ug ang usa niini na-ospital tungod sa sakit.

Ang C-LOSAP nihatag og higayon ug panahon sa usa ka trabante nga makahatag sa iyang ihi apan pipila ka gutlo kalit lang kini nawagtang.

Sumala pa ni Lao nga ang CTMS maoy ikaduha nga department nga napaubos nila sa kinalit nga drug test.

Ang tulo nga absent ipaubos gihapon sa drug test sa higayon nga kini sila mobalik sa trabaho.

Si Lapu-Lapu City Mayor Junard “Ahong” Chan nitug-an nga makonsiderar nila nga walo ang positibo human adunay nagdumili sa pagpangihi.

Sumala pa sa mayor nga sa higayon nga makompirmar ang mga nagpositibo sa ginadili nga drugas malagpot gyud kini sila sa trabaho.

Dugang ni Chan nga gi-priority niya ang mga traffic enforcers tungod kay kung tiggamitan kini og ilegal nga drugas dili kini sakto sa panghunahuna ug mangita kini og mga pamaagi aron makakwarta.

Maoy tinguha ni Chan nga drug-free working place ang Lapu-Lapu City Hall. (/GMR)(BANAT NEWS)