Illegal refilling station miulbo

CEBU, Philippines – Gibati og kalisang ang pipila ka mga residente human milanog ang sagunsong butobuto ug dunay baga kaayong itom nga aso diha sa Sitio Dawis, Barangay San Roque, Dakbayan sa Talisay kagahapon sa udto.

Nasuta nga usa diay ka illegal nga LPG refilling station nga gisulod sa mga disposable butane canisters ang niulbo.

Si Fire Senior Inspector Arra Alpajaro, fire marshal sa siyudad miingon nga nakontrolar hinuon dayon ang pagkatap sa sunog sud sa 10 minutos apan naabtan sila hangtud alauna ayha pa kini hingpit napawong.

Si Konsehal Eking Bustillo sa San Roque nitug-an nga adunay mga trabahante sa maong illegal refilling station ang nakit-ang naglumba og panagan pagawas human may miulbong kalayo sa sulod ug nisunod dayon ang buto-buto.

Tungod sa kainit sa palibot, nanglupad ang mga tangke sa Liquefied Petroleum Gas (LPG) ug mga lata sa disposable butanes nga gisudlan og LPG, swerte hinuon nga walay bisan usa ka molupyo ang naigo. Atol sa clearing operation, nakita ang nagpasad nga mga tangke sa LPGs ug mga disposable butane canisters nga angay na untang ilabay.

Lakip sa naugdaw ang duha ka van nga puno sa butane canisters ug SUV nga Montero nga gituohang gipanag-iya sa nag-operate sa maong illegal LPG refilling station. Gibanabanang P720 mil ang danyos nga gibilin sa maong sunog.

Usa ka ginganlan og “Chona” nga giingong maoy nag-abang sa maong lugar ang padad-an og imbitasyon sa BFP Talisay City sa himuong imbestigasyon.

Si Alpajaro miingon nga ilegal gyud ang maong establisamento tungod kay peligro ang pag-refill og LPG sa mga disposable butane canisters. Ang maong mga lata nipis ug  ang uban tayaon na ug dili sab kini gidesinyo nga haom aron sudlan og LPG.

Ang aksidenteng pag-ulbo sa mga LPG-filled butane canisters maoy usa sa mga nag-unang hinungdan sa mga dagkong sunog nga nahitabo dinhi sa Metro Cebu sud na sa nakalabay nga tulo ka tuig. Sa laing alarma sa sunog nga gitubag sa kabumberohan kagahapong adlawa, wala mapalong nga ceiling fan maoy gituohang hinungdan sa sunog nga niulbo sa may Sitio Isla Mahilum, Barangay Basak San Nicolas sa Dakbayan sa Sugbo kagahapon sa buntag.

Ang alarma nadawat alas-8:21 ug napawong paglabay sa kapin tunga sa oras. Ang sunog nagsugod sa ikaduhang andana sa panimalay ni Madeline Nuemeran nga ginama sa light materials

Pito ka mga panimalay ang naugdaw ug gibana-bana moabot ngadto sa P70 mil ang gibiling danyos.

Matud pa ni Senior Fire Officer 3 Oliver Tautho, Duty Fire Investigator walay natala nga naangol o nakalas sa maong sunog.

Samtang si Nuemeran nitug-an nga kalit kaayo ang hitabo ug dako kaayo na ang kalayo sa ikaduhang andana dihang iyang nabantayan. Tungod niini wala gyud silay nabitbit bisan usa ka gamit.

Nagtuo si Nuemeran nga ceiling fan sa ilang taas nga wala mapalong sa iyang anak ang sinugdanan niini.

Sa laing hitabo, P1.2  milyones ang gibanabanang gibiling danyos sa nasunog nga bodega sa Sitio  Tambis sa  Barangay  Casuntingan   sa  Dakbayan  sa Mandaue  niadtong Lunes sa hapon.

Si  Deputy  Fire  Inspector Kyle  Bryan  Lauzon giisa dayon kini ngadto sa third alarm tungod naay kabalayan duol sa maong bodega nga  gipanag-iya ni Henry  Ng. Hingpit napawong ang kalayo alas 7:47  na ang takna sa gabii. (Rowena Capistrano ug Romeo  T.Limpangog/IBM)(BANAT NEWS)