P9 million medical equipment gidonar ni Mabatid sa VSMMC
CEBU, Philippines — Mga medical equipment nga nagkantidad og P9 milyones gidonar ni Konsehal Niña Mabatid ngadto sa Vicente Sotto Memorial Medical Center kagahapong adlawa nga gipanglantawang magamit gyud sa maong tambalanan.
Ang pundo gikan sa iyang kaugalingong bulsa aron ipalit sa mga gamit sama sa 15 ka electro-mechanical beds with IV holders, 15 hospital bed foams, 15 slide tables, 2 cribs, 9 IV stands, 1 microscope, 3 chair scale.
Dugang gihatag ang emergency trolleys, usa ka endoscope nga dunay trolley, ultrasound with trolley ug tulo ka rollators.
Ang kadagkuan sa VSMMC pinangulohan ni Dr. Gerardo Aquino mihangop sa maong donasyon nga madugang sa ilang mga gikinahanglang ekipo aron pagserbisyo sa ilang mga pasyente dili lang gikan sa Cebu City kondili hasta sa mga silingang mga dapit.
Dugang pa ni Aquino haom kining mga donasyon ni Mabatid sanglit padayon silang nagpalambo sa ilang serbisyo. Sa pagpadako sa VSMMC nagkinahanglan sila og mga dugang gamit sama niini.
Si Mabatid kinsa maoy number 2 nga konsehal sa North District sa iyang pamahayag miingon nga pagtuman kini sa iyang mga gisaad niadtong panahon sa kampanya sa nakalabay nga eleksyon.
“I am just fulfilling a promised which I did last campaign that If ever I will be given a chance to sit in the City Council I will do everything in my capacity to help the constituents of Cebu City and of course it includes the hospital,” padayag ni Mabatid kinsa misaad nga sa pagsugod na og balik sa operasyon sa Cebu City Medical Center ang mao na sab nga tambalanan ang iyang tutokan.
Giklaro hinuon sa konsehal nga dili kini pamolitika kay matud niya kabahin kini sa serbisyo ngadto sa publiko ug naswertihan lang gyud siya ug kini iyang gipaambit sa uban. (BN Associate Editor) (BANATNEWS)
- Latest
