Awol nga polis sikop sa buybust

CEBU, Philippines — Usa ka nag-AWOL (absence without official leave) nga polis ug napulo ka mga tawo ang nadakpan sa anti-drug operations nga gilusad sa kapolisan sa Dakbayan sa Sugbo ug Provincial Intelligence Branch sulod sa 24-oras gikan adlaw nga Sabado hangtod sa Domingo.

Ang AWOL nga polis nga si Christian Ando, 34, taga Sitio Latid, Barangay Poblacion Pinamungahan, nga gikonsiderar nga Provincial Level High Value Target  uban sa usa ka Allan Abaquita, 44, taga Barangay Mohon Tuburan, ang nasikop sa mga tinugyanan sa Provincial Intelligence Branch atol sa buy bus operation.

Matud pa ni Police Lt. Colonel Marlu Conag, hepe sa PIB, usa ka hiniusa nga operation ang ilang gihimo kauban ang Pinamungahan Police Station ug PDEA 7 batok sa suspek. Nasakmit gikan sa duha ka mga dinakpan ang 11.8 gramos nga shabu. Sumala pa ni Conag, ang police kanhi nadestino sa Station 2 sa Lapu-Lapu City Police Office ug ni- AWOL sa serbisyo niadtong 2018.

Matud ni Conag, si Ando dihang ilang gipangutana nganong ni-AWOL kini sa serbisyo giingong mitug-an kining na-low moral kini dihang wala sila hatagi sa ilang allowance.

Matud pang Conag sa dihang na-dismiss sa serbisyo si Ando diha na kini nagsugod og bisyo hangtud nga namaligya na gyud og illegal nga drugas. Giingong konektado si Ando sa mga drug dealers sa Dakbayan sa Sugbo.

Sa operasyon sa Santan Street, San Jose Village, Barangay Tisa nasikop ni Manuel Duran, 43,taga Sitio Motra sa maong barangay kinsa gireklamo sa mga silingan pinaagi sa Hotline 8888 bahin sa iyang pagpamaligya og illegal nga drugas.

Ang mga sakop sa Labangon Police Station 10 milusad og operasyon batok sa suspek ug nakuhaan kini og mga pinutos nga gidudahang shabu.

Nasikop sab sa may Sitio UBCA III, Barangay Quiot si Ruben Pasculado, 23, kinsa gisumbong gihapon sa mga silingan sa Hotline 8888  ug nasakmitan og usa ka gramong gidudahang shabu.

Laing nasikop sa may Cogon, A.Lopez sa Barangay Labangon ang usa ka Prince Ryan Abatol, alyas Dodoy, 27, nga nakuhaan sab og pinutos nga gidudahang shabu.

Duha usab ang nasikop sa may Unit II Carbon Market, Barangay Ermita nga sila si Leonard Plarisan, alyas Timoy, 33, ug Geraldine Caballes, 35, taga Barangay Guadalupe.

Ang nakadakop kanila mga sakop sa Police Station 5  ug nakuhaan sab og mga pinutos nga gidudahang shabu.

Sa laing operasyon, nasikop sa may Sitio Calijon, Barangay Labangon mao sila si Keith Jonry Poncardas alyas Keith ,21, ug Ralph Donal, alyas Raprap, 23, parehong mga high value target sa siyudad ug nasakmitan og 50 gramos sa gituohang shabu nga mobalor og P340 mil lakip ang buy bust money.

Nasikop usab sa may Sitio Katsilaan Barangay Ermita sila si Jerry Cuizon,20, taga Sitio Belgium, Barangay Pasil ug Eduardo Giltendez, 38, taga Colon Street, nakuhaan ang mga dinakpan og 5.35 gramos nga shabu nga mobalor og dul-an sa P37 mil.

Nadakpan usab sila si Joseph Casinto, 19, ug Dolpedio Camison, 31, taga Manlapay, Dalaguete, nakuhaan ang mga dinakpan og 5.25 gramos nga gidudahang shabu.

Nasikop usab si Marjun Babatid, 21, taga Sitio Lawis, Barangay Pasil ug Dhancia Tapia, taga Barangay Kamagayan nasakmit sa duha ang lima ka gramong gituohang shabu.

Nadakpan sab sa kapolisan sa Presinto 3 sa Lapu-Lapu  City Police Office (LLCPO) sa Sangi Road, Barangay Pajo ang usa ka Romeo Pangulong Dress nga giingong nakuhaan mga gagmay nga paketeng gidudahang shabu.

Nadakpan sab sa may Zone  6,  Barangay Buaya  si Christian Dave Panugon Tabon, 28, taga F.  Villa  sa Barangay T.  Padilla  sa Dakbayan sa Sugbo human kini nakuhaan sab og pinaketeng gidudahang shabu. (Romeo Limpangog/IBM)(BANATNEWS)