Unom naangol sa aksidente

CEBU, Philippines — Unom ka tawo ang naangol human usa ka Toyota Town Ace nga sakyanan kargahanan og mga utanon ang nawagtangan og brakes ug nalimbuwad sa Upper Taloot, sa Lungsod sa Argao, Sabado sa buntag..

Ang mga biktima naila nga sila si Bernabe Aballe, 46, taga Barangay Botong, driver sa maong sakyanan, Florentina Sabanal; Luinela Aballe; Layla Saguisa; Mariel Alcaide ug Angela Templa, mga residente sa Argao.

Matud pa ni Kent Rizon, pangulo sa Argao Disaster Management Office unom ilang gipadala sa tambalanan sa Dakbayan sa Sugbo tungod sa mga naangkon og kadaot sa ilang kalawasan.

Sumala pa ni Rizon gihatagan og basic first aid ang mga biktima ayha pa sila gidala sa tambalanan.

Ang maong sakyanan mohatod unta og mga utanon sa mga tinda-tindahan apan tungod kay managsilingan ra man ang mga sakay nakisakay nalang sila aron motambong ug anniversary sa usa ka bangko nga adto ipahigayon sa lungsod sa Sibonga.

Matud pa usab ni Police Corporal Ariel Conde, Traffic Investigator sa Argao Police Station, padulong motambong og anniversary ang sakay sa maong mga sakyanan nga 15 ka buok. Apan pagabot sa maong lugar nalimbuwad ang sakyanan kay nawagtangan ug brake.

Dugang pa ni Conde, tulo sa mga pasahero ang nakaangkon ug grabe nga mga angol lakip ang driver. Gitug-an ni Conde, disgrasya ang nakita nila sa maong insidente apan padayon gihapon ang ilang imbestigasyon nga himoon. (/IBM)(BANATNEWS)