CCPC: Fake news nisanay og mayo
CEBU, Philippines — Ang pagbatok sa mga sayop nga impormasyon o fake news nga nikatap karon hilabina sa social media maoy nahimong sentro sa diskusyon sa Cebu Citizen’s Press Council.
Atol sa forum nga gihimo sa CCPC niadtong Huwebes, si Father Ramon Echica nagkanayon nga mosulod ang fake news kun ang mga mobasa dili kahibalo mo-verify o walay verification nga gihimo sa impormasyon nga nakuha hilabina diha sa internet.
Matud ni Echica nga dali ra motuo ang pipila karon hilabina kon ang mo-post niini ang gitawag nga “influencers” o bisan kadtong mga public figure sama sa mga lider sa politiko o mga inila nga supporter niini.
“Sometimes leader are the one who creates fake news”, matud ni Echica.
Ang mga public figures sama kang Presidente Rodrigo Duterte ang nahimo usab nga mga biktima sa fake news.
Samtang ang mga media practitioner dili malikayan nga masayop sa paghatag og impormasyon apan kinahanglang kahibalong moangkon ug korihian ang nahimong sayop.
Si professor Jason Baguia sa iyang bahin, nihatag kini og mga pamaagi aron malikay nga mahulog sa fake news.
Matud ni Baguia kinahanglan ang “fact-checking” pinaagi sa mga “fact-checking” websites.
“Remember that social media is not the entirety of the internet, do not just only read headlines”, matud ni Baguia. Kinahanglan nga mobasa sa detalye sa estorya.
“Remember that social media is not journalism, though journalist use social media, the mere fact that you just post online does not make you a journalist”, dugang ni Baguia. (/BDB)(BANATNEWS)
- Latest
