Mga baboy gipabalik sa Negros
CEBU, Philippines – Gibalik paingon sa San Carlos City, Negros Oriental ang 53 ka buhi nga baboy nga gidunggo sa Dakbayan sa Toledo.
Kini human na-intercept sa Toledo City Port atol sa hiniusa nga operation nga gipangulohan ni Toledo City Veterinary Inspector Belarmino Birao uban sa abag sa Coast Guard ug City Port Security.
Ang 53 ka baboy gipanag-iya sa duha ka shippers nga giingong walay livestock ug poultry transport permit, no certificate of vehicle registration, ug no inspection clearance.
Matud ni Glennette Nabalitaan, tigpamaba sa kagamhanan sa Dakbayan sa Toledo, nga ang 53 ka baboy na-intercept niadtong Miyerkules sa gabii ug Huwebes sa kaadlawon tungod sa kakulangan sa mga dokumento.
Sumala pa ni Nabalitaan nga ang maong mga baboy gipabalik kini sa ilang gigikanan.
Gitug-an ni Nabalitaan nga gihingusgan sa ilang City Veterinary Office ang pagseguro nga kadto lang mga baboy nga adunay klaro nga dokumento ang makasulod sa dakbayan. (/GMR)(BANAT NEWS)
- Latest