Mga saksi sa sunog sa Mambaling ipatawag
CEBU, Philippines – Ipatawag sa Cebu City Fire Department ang mga testigo labot sa sunog sa tulo ka sitio sa Wangyu, Ipil-ipil ug Abbya sa Alaska, Mambaling.
Kini aron masayran ang hinungdan sa sunog nga niugdaw sa 70 ka panimalay niadtong Miyerkules sa buntag. Matud ni Senior Fire Officer 3 Lowell Opolentisima, fire investigator, nga padayon pa karon ang ilang gihimo nga imbestigasyon tungod kay wala pa silay matumbok nga hinungdan sa sunog.
Samtang si Simeon Romarate, pangulo sa City Hall Division for the Welfare of the Urban Poor, nitug-an nga ilang sutaon ang kahimtang sa mga nasunogan kung kinahanglan ba ipaubos sa re-blocking aron ilang marekomendar.
Matud ni Romarate nga aduna nay dalan sa Alaska apan dunay mga parking nga sakyanan nga nakaali ug mga tapangko nga nilapas sa balay nga nakahatag og kalisud sa mga niresponde nga kabomberohan.
Labing ulahing talaan nasuta nga kapin sa 500 ka individuals ug dul-an 100 ka pamilya ang apektado sa maong sunog. (/GMR)(BANAT NEWS)
- Latest
