Babayeng HVT, kauban gisikop sa Talisay
CEBU, Philippines – Babaye nga high value target (HVT) ug duha niya ka kauban ang nasikop sa gihimo nga buy bust operation diha sa Barangay Bulacao, Syudad sa Talisay niadtong Miyerkules sa gabii. Ang nasikop mao sila si Cresilda Zafra alyas Cres; Jerry Ligaspino Catimbang, 30 ; parehong taga Pardo sa Siyudad sa Sugbo ug si Sabareno Reyes Cabanes, 28, taga sitio Magay, Brgy. Tangke, Talisay City. Si Police Captain Nazarino Emia, deputy chief sa Talisay City Police Station nagkanayon nga nilutaw ang pangan ni Zafra gikan sa mga nangaging mga dinakpan.
Gani atol sa transaksyon nakuhaan gyud siya og ilegal nga drugas nga mitimbang og 15.14 gramos nga adunay bana-bana nga kantidad nga P102,952.
Si Emia miingon nga si Zafra maoy nag-supply og ilegal nga drugas adtong babaye nga mabdos nga taga Barangay Pooc, kinsa nasikop na nila. Ang tulo gidala sa Talisay City Police Station ug gibalhug sa bilangguan.
Gikatakda silang pasakaan og kaso labot sa pagpayuhot og ilegal nga drugas. (/IBM)(BANAT NEWS)
- Latest