Upat ka “Alimaong” gidakop

CEBU, Philippines – Upat ka mga lalaki nga gituohang sakop sa Alimaong ang nasikop sa mga tinugyanan sa Carbon Police Station Huwebes sa buntag human sila nakuhaan og mga mahait nga hinagiban ug armas sa dihang gireklamo sa pipila ka mga manindahay kay giingong nangayo og abang sa yuta nga giangkon nilang ilaha. Ang mga nadakpan naila nga sila si Kali Sirol, 41, taga Barangay Pahina- Central, Datu Elra Kidlat, 40, taga Barangay Tejero, Kali Panther,49, taga Sitio Bahaw, Barangay T. Padilla, Datu Apo  Kabales, 48, taga Sanciangko Street, Barangay Pahina Central  sa Dakbayan sa Sugbo.

Nasakmit gikan sa mga dinakpan ang mga mahait nga hinagiban nga naglakip sa espada ug usa ka kalibre 45 pistola, tulo ka magazines ug 44 ka bala.

Matud pa ni Police Captain Franklin Tale Jr., OIC-Chief sa Carbon Police Station, adunay nanawag sa ilahang buhatan kay anaa ang presensya sa mga armado nga giingong nangayo og abang kay sila maoy nanag-iy sa luna nga gitarukan sa ilang mga tindahan. Sumala pa ni Tale, ang uban sa mga nanindahay ang nahadlok tungod kay ang mga suspek mopakita-kita man sa ilang dala-dala nga mga mahait nga hinagiban hinungdan nga nanawag sila og polis. Ang mga dinakpan wala hinuon mopakita og pagsupak dihang nangabot ang mga polis ug giimbitar sila sa police station ug gipatahan ang ilang mga dala nga mahait nga hinagiban ug armas. Sa dihang gipangitaan sila og mga papeles wala silay napakita nga mga dokumento ilabi na sa paghupot sa mga armas.

Ang lider sa grupo nga ginganlan og Bontita Leon Kilat, nagpailang Chairman sa Internasyonal ug Nasyonal nga kinatas-an kahugpungan sa mga kadatuan KKK-Alimaong mitug-an sa media nga ang iyang mga tawo igo rang nangolekta sa abang sa ilang mga kabilin.

Giklaro sab niyang wala sila manghulga sa mga vendors ug mipasangil nga gikulata sa mga SWAT iyang mga sakop nga matud pa niya naa sa kasabotan nga duna silay bahin sa mga yutang kabilin. Giklaro sab niya nga sila adunay pagtugot pagdaladala og mga hinagiban isip mga lumad ug dili sab pagpangilkil ilang gihimo. Apan bisan pa sa ilang mga pangangkon gipaslak sa prisohan ug pasakaan og kasong paghupot ug armas lakip ang mahait nga hinagiban ang upat. (Dina Atip/IBM)(BANAT NEWS)