Shabu gisud sa napkin

CEBU, Philippines – Mokabat sa P6 milyones ang balor sa marijuana nga nalarot sa may Sitio Mit-ol, Tagbao, bukirang barangay sa Dakbayan sa Sugbo, alas 11:20 niadtong Martes sa buntag.

Nasikop ang nag-atiman niini nga si Junrel Cubong, hingkod, residente sa maong lugar.

Ang operasyon hiniusang gipahigayon sa City Mobile Force Company, Police Station 8 Station Drug Enforcement Unit, City Intelligence Branch, PDEG7, PDEA7, NAVFORCEN, mga opisyal  ug tanod sa Barangay Tagba-o.

Nalarot ang 15,169 ka punoan sa marijuana nga gibana-bana nga mobalor og P6,067,000.00.

Ang dinakpan gikatakdang pasakaan og kaso samtang gitanggong sa Police Station 8 ug ang mga marijuana gidauban lang sa lugar gawas sa pipila ka punoan nga gidala sa Regional Crime Laboratory 7.

Samtang mokabat sab sa kapin usa ka milyon ka pesos ang balor sa drugas nga nasakmit sa kapolisan sa Dakbayan sa Sugbo.

Ang P170 mil nga balor sa drugas ang nasakmit gikan sa usa ka dalaga sa may N. Bacalso Avenue, Barangay Sambag 1 niadtong Martes sa gabii atol sa buy-bust operation.

Ang nasikop mao si Sharadon Avestado alyas Sarah, 27, high value target nga taga Sitio Viking, Alaska, Mambaling.

Nasakmit gikan sa dinakpan ang nagkadaiyang putos sa ginadili nga drugas nga motimbang og 25.05 gramos ug napkin nga maoy gisudlan sa ginadili nga drugas nga gitunol atol sa buy-bust.

Sumala pa sa dinakpan nga dugay-dugay na siya nagbuhat niini sukad niadtong Enero ug siya gisugo lang sa pagbaligya niini apan nagdumili  pagbutyag sa pangan.

Laing operasyon nahitabo sa may Barangay Ermita Proper alas 10 sa gabii nga gikasikop ni Jezzel Membrillas alyas Jazzel, 34, minyo, walay trabaho ug residente sa maong lugar.

Nasakmit gikan kang Membrillas ang drugas nga motimbang og 30 gramos nga mobalor og P204 mil.

Katapusan nga nasikop mao sila si Rolito Caja, 51, minyo, taga Sitio Mangga, Barangay Tisa, atol sa buy-bust nga gipahigayon sa may Neptune St., Tisa Hills; Jasson Fernandez, 42, taga Sitio Pilipog, ug Joel Pilapil, 42, taga Sitio Motra ug pulos high-value target station level. Nasakmit gikan sa mga dinakpan ang mga pinutos sa ginadili nga drugas nga motimbang og 100 gramos nga mobalor og P680 mil.

Sa laing bahin nasakmit sab ang kapolisan sa Dakbayan sa Lapu-Lapu ang mokabat P180,000 nga kantidad sa shabu atol sa sunod-sunod nga buy-bust operation.

Si Police Lieutenant Colonel Mark Gifter Sucalit, hepe sa City Intelligence Branch niila sa nadakpan sa buy-bust operation sa may Mactan-Mandaue Bridge nga mao sila si Emilyn Floria Vocal, 45, ug Precy Sullivan Dela Pena, 49, pulos taga Seaside, Barangay Pajo.

Samtang sa Sitio Matumbo, Barangay Pusok nadakpan ang duha ka pusher nga sila si Warren Pahugot Julito, 34, ug Luordynn Cinco Chan, 23, pulos taga Barangay Marigondon.

Sa Sitio Sta. Maria, Pusok nadakpan ang pusher nga si Demmark Kaye Alfante Remolleno, 24, taga Zone 7, Barangay Buaya.

Dugang nadakpan mao si John Roy Adlaon Alacida, 20, taga Sitio San Roque, Barangay Pusok. (Dina Atip ug Romeo T. Limpangog/GMR)(BANAT NEWS)