161 ka sakyanan gikatakdang isubasta sa CT-TODA
CEBU, Philippines — Niabot nga sa 161 ka sakyanan ang gikatakdang isubasta sa City of Talisay-Traffic Operation Development Authority (CT-TODA) kong ang maong mga sakyanan dili tagdon o lukaton sa mga tag-iya niini.
Si Jonathan “Joy” Tumulak, hepe sa CT-TODA nibutyag nga sa 161 ka sakyanan ang 133 niini mga motorsiklo, 13 ang pribado, lima ang traysikad, pito ang traysikol ug tulo ng e-bike.
Ang maong mga sakyanan nga na-impound naa kini gibutang sa impounding area kilid sa buhatan sa CT-TODA diha sulod sa compound sa Talisay City Hall.
Si Tumulak nagkanayon nga ubos sa ordinansa sa siyudad mahimo nila nga isubasta ang mga sakyanan nga na- impound kong niabot na sa duha ka buwa nga wala tagda sa mga tag-iya ang ilang mga sakyanan.
Base usab sa talaan sa CT-TODA kadaghanan sa mga na impound nga sakyanan nilapas na sa usa ka tuig ang gidugayon niini.
Ang CT-TODA gikatakdang mopadala og suwat ngadto sa mga tag-iya sa sakyanan ug hatagan sila og 10 ka adlaw aron lukaton ang ilang mga sakyanan.
Ang pagsubasta sa nahisgutang mga sakyanan ipahigayon sa buwan sa Oktubre o sa Nobiyembre niining tuiga. (BDB) (BANAT NEWS)
- Latest
