Way ASF ang Central Visayas

CEBU, Philippines — Walay natala nga kaso sa African Swine Fever sa Central Visayas.

Kini sumala pa sa Regional Executive Director sa Department of Agriculture 7 nga si Atty. Salvador Diputado bisan gikompirmar sa Bureau of Animal Industry nga dunay outbreak sa ASF sa Rizal ug Bulacan sa Luzon.

Sigun ni Diputado nga luwas ang Central Visayas ug ang gihimo sa ahensiya mao ang pag-locked down gyud sa rehiyon aron maseguro nga dili makasulod ang ASF virus.

Iyang gihulagway nga importante kini dungan sa pagbutyag nga gikinahanglan sab ang pagtinabangay sa tanan.

“Safe ra ta diri sa ato, ang atoa lang is locked down gyud ta diri sa ato sa region, sa Central Visayas, nga wa gyuy makasulod nga ASF virus mao ra gyud nay importante, magtabangay tang tanan,” matud ni Diputado.

Gihimug-atan sab ni Diputado nga dili angay mabalaka ang katawhan ug magmabinantayon lang gyud sa kanunay.

“In fact duna nay mga mismo ang mga provinces, LGU duna na sila’y executive order nga gipagawas, implementation lang ana maoy importante kaayo. Dili gyud malutsan ba, istriktuhon gyud mao nang atong hangyuon atong katawhan nga mosabot lang pud usahay kung dunay mga istrikto nga mga pamaagi bahin sa pagpanghiling sa ilang mga butang kay importante man gyud na siya,” dugang ni Diputado.

Hangyo ni Diputado sa katawhan nga kun makabantay nga ang mga hayupan dunay sakit i-report gyud dayon kini ug dili huwaton nga mograbe ug dili sab magtago-tago kay dili kini maayo.

Kini niasoy nga magtinabangay gyud ang tanan kay kun pananglitan kini makasulod sa rehiyon ang tanan maoy maapektuhan. (GMR) (BANAT NEWS)