Kapitolyo nihangyo sabton ang pag-ban sa mga baboy
CEBU, Philippines — Nangayo og pagsabot ang buhatan sa provincial veterinarian sa mga magpapatigayon nga apektado sa pag-ban sa mga binuhing baboy gikan sa ubang probinsiya tungod sa hulga sa African Swine Fever (ASF).
Kini human nga pipila sa mga gagmay nga naninda og baboy o mga gagmay nga negosyante naapektohan na sa gipatuman nga ban sa Probinsiya sa Sugbo.
Si Dr. Mary Rose Vincoy kinsa maoy vice chairman sa ASF Task Force sa lalawigan nipasabot nga gusto lang maseguro nga dili moabot sa Sugbo ang maong sakit sa baboy sanglit risgo niini ang tibuok industriya sa karneng baboy.
Giingong nakahatag kini og P10 bilyones nga tampo sa ekonomiya sa Sugbo.
"Ang ako lang hangyo, they have to cooperate kay di man sila ray sector ang maapektohan, and there's more hog raisers than letchoneros," matud ni Vincoy.
Ubay-ubay na nga mga buhing baboy ang nasakmit sa ASF Task Force sa mga pantalan nga gipabalik sa mga gigikanan.
"Hilabi na nga moingon sila nga they are from backyard, the more we are concerned kay wala man silay mapakita nga certificates," matud ni Vincoy.
"Sa backyard we don't know if gi-interisland ba na nga transhipment ba na or they are really from those barangays na gikan, we don't know if diha na gikan hilabina sa auction market," dugang ni Vincoy.
Si Gob. Gwendolyn Garcia nipagawas og tulo ka executive order sa pag-ban sa mga live hogs ug pork meat products, ma-processed man o frozen, nga walay igo nga permit o requirements.
Ang mga gikan sa Luzon dili gyud ipasulod sa probinsiya tungod sa maong sakit nga una natala didto sa Rizal ug Bulacan.
Karon gikonsiderar na sa Department of Agriculture nga epidemic ang ASF lukop nasud. (GMR) (BANATNEWS)
- Latest