Kinalimpyohang dapit may premyo sa Talisay City

CEBU, Philippines —  Aron makuha ang partisipasyon sa katawhan paglimpyo sa palibot gimugna ni Talisay City Mayor Gerald Anthony “Samsam” Gullas Jr. ang ‘Basura mo, Panginabuhian ko’ nga programa kagahapong adlawa diin premyohan ang kinalimpyohang dapit.

Sumala pang Gullas dako gyung problema ang basura ug dili kini mahimong ang gobiyerno lang maoy molihok.

Ang basura maoy pirmeng hinungdan sa pagbaha tungod kay mobara man kini sa mga kanal ug mga gawasanan sa tubig baha.

Ang programa nidasig sa tanang Talisaynon lakip na ang taga purok, barangay ug tunghaan aron sila hiposon ug i-recycle ilang mga basura.

Magtigi ang katawhan sa pinakalimpyo nga barangay, purok ug tunghaan nga mahimo silang makadawat og premyo nga salapi.

Ang mga mananaog makadawat sa ilang pasidungog ug premyo sa buwan sa Enero kun diin saulogon ang Charter Day sa dakbayan. (IBM) (BANATNEWS)