Anti-dengue council tukuron sa siyudad

CEBU, Philippines —  Giduso sa usa ka konsehal sa Siyudad sa Sugbo ang ordinansahon nga magmugna og Cebu City Anti-Dengue Council (CCADC).

Matud ni Konsehal Eugenio Gabuya nga kinahanglan nga dugangan sa siyudad ang mga paningkamot sa pagsulbad sa sakit nga dengue labi na panahon sa ting-uwan.

“In order to lessen the impact of dengue in the city, a comprehensive approach is needed, which requires all sectors including health, finance, planning and others to work together to reduce the risks associated with dengue and to promote interventions and/or control,” sigun niya.

Gitun-an pa sa committee on laws, ordinances, and styling sa konseho ang sugyot ni Gabuya alang sa mga komentaryo ug rekomendasyon.

Ang komposisyon sa CCADC naglakip ni Mayor Edgardo Labella isip chairman o iyang representante ug City Health Officer, Dr. Daisy Villa o ang iyang representante isip vice chairman.

Ang mga sakop sa CCADC mao ang opisyal sa panglawas ug sanitasyon, chairman sa committee on health, hospital services and sanitation; chairman sa committee on environment and natural resources; committee on barangay affairs; committee on budget; committee on social services; school superintendent o iyang representante sa Department of Education-City Division; City Planning Officer, CENRO, ug usa ka accredited NGO.

Ang matag miyembro makadawat og P1,000 nga honorarium alang sa matag miting nga ilang tambungan.

Gihangyo niya ang City Health Office nga magsilbing sekretaryo sa tukuron nga konseho.

Pipila sa mga gimbuhaton sa konseho mao ang pagporma og mga palisiya ug mga pamaagi sa pagpugong ug pagkontrol sa pagkaylap sa dengue sa syudad; pag-monitor ug pagtimbang-timbang sa pagpatuman sa mga programa, plano ug mga pamaagi niini; pag-organisar ug pag-awhag sa mga tag-iya, operator, managers sa mga narehistro nga pagtukod sa negosyo, lugar sa trabaho, ug mga eskwelahan nga aktibo nga moapil sa pagpugong ug pagkontrol sa dengue ug uban pa.

Si Gabuya niingon nga ang konseho kinahanglan usab magrekomendar sa Sangguniang Panlungsod alang sa bisan unsang mga lakang nga makatabang sa pagpugong ug pagkontrol sa pagkaylap sa dengue.

Samtang nagkaubos ang gidaghanon sa kaso sa dengue sa tibuok Lalawigan sa Sugbo gikan sa Enero hangtud unang semana sa buwan sa Septiyembre.

Base sa record sa Provincial Health Office makita nga sa buwan sa Enero niabot sa 1,149 ang kaso lukop probinsiya apan niubos kini ngadto sa 783 sa Pebrero ug mas niubos pa sa buwan sa Marso diin dunay 472 ug sa Abril adunay 197.

Nisaka kini og gamay sa buwan sa Mayo diin dunay 189 ug niabot sa 313 sa Hunyo, nisaka pa og 624 sa Hulyo apan niubos og 510 sa Agosto.

Sa unang semana sa Septiyembre, 71 ang natala nga kaso. Sa kinatibuk-an, moabot sa 4,058 ang kaso sa dengue gikan Enero hangtud Septiyembre 6, 2019.

Mas taas pa gihapon hinoon kini kun itandi sa 2,673 sa susamang period sa tuig 2018. Moabot usab og 23 ang patay sa dengue sa lalawigan karong tuiga samtang sa 2018 niabot sa 26 ang namatay tungod sa maong sakit. (GMR) (BANATNEWS)