Mga supplier apektado sa pag-ban sa mga baboy

CEBU, Philippines — Hinay-hinay na nga nabatyagan sa mga pork supplier sa Probinsiya sa Sugbo ang epekto sa gipanghinugsgan nga pag-ban sa mga imported nga karneng baboy.

Sa niaging semana gipirmahan ni Gobernardor Gwendolyn Garcia ang Executive Order No.15 nga nagdili sa pagpasulod sa Probinsiya sa Sugbo sa mga baboy ug produkto niini gikan sa Rizal ug Quezon sa Luzon.

Tumong niini nga mapugngan ang pagsulod sa African Swine Fever sa Probinsiya sa Sugbo.

Sayo pa, nakompirma nga adunay mga nangamatay nga baboy didto sa ubang parti sa Luzon tungod sa ASF.

Lakip sa maong EO ang dugang rekisitos sa pagpasulod og baboy sa probinsiya nga mao ang Livestock Handlers’ Permit, Farm Registration, Livestock Transport/ Carrier Registration, Vehicle Registration and Disinfection Clearance.

Nagsugod na og balibad og mga lechon order ang mga tag-iya og litsonan sa probinsiya tungod sa kakulangan sa supply sa baboy.

Gikatahong nisaka ang kantidad sa baboy sa Sugbo kompara sa baboy sa Negros Oriental diin kasagaran gi-import sa mga litsonero ang ilahang baboy.

Si Henry Llaguno nga nagtag-iya og usa ka litsonan nibutyag nga nawad-ad og P200,000 nga halin gikan sa 100 ka order nga iyang gibalibaran diin alang unta ang maong order nga lechon baboy sa mass wedding nga ipahigayon sa Siyudad sa Sugbo.

Sama kang Llaguno, si Nevoj Bascon nawad-an usab og halin gumikan sa gipahugtan nga pag-ban sa mga baboy ug mga produkto niini.

Matud pa ni Bascon nga P15,000 nga halin ang iyang nawala gikan sa 20 ka order nga iyang gibalibaran.

Ang pag-ban sa baboy og produkto niini molanat ngadto sa 100 ka adlaw. (/BDB)(BANATNEWS)