Hubog nalumos samtang naligo sa dagat
CEBU, Philippines — Usa ka 40-anyos nga lalaki nga giingong hubog ang nalumos samtang naligo sa dagat niadtong Sabado sa hapon diha sa Barangay Sayaw, Lungsod sa Barili.
Ang nalumos mao si Romeo Villaflores, nagpuyo sa Barangay Santa Ana sa maong lungsod ug lumad nga taga Lungsod sa Alegria. Matud ni Police Master Sergeant Mark Anthony Fat, desk officer sa Barili Police Station nga si Villaflores kuyog sa ilang mga silingan ug higala nga nangaligo sa dagat diin nagsawom-sawom kini sa taga hawak nga gilawmon sa tubig.
Ang mga kauban ni Villaflores nahibulong tungod kay wala na kini mobarug hinungdan nga ilaha kining giduol ug nabantayan nga wala na kini molihok.
Si Villaflores daling gidala sa iyang mga kauban ngadto sa Barili District Hospital apan gideklara kining patay na nga naabot sa maong tambalanan.
Giingong sa pag-eksamin sa doktor sa patay’ng lawas ni Villaflores nasuta nga nalumos kini.
Nasayran sa investigating team sa Barili Police Station nga nakainom si Villaflores dihang naligo sa dagat. (/BDB)(BANATNEWS)
- Latest