HVT sikop sa kapolisan sa Talisay
CEBU, Philippines — Nasikop atol sa gipahigayong buy bust operation sa kapolisan sa Dakbayan sa Talisay ang usa ka giingong high value target (HVT) nga tigpayuhot og ilegal nga drugas niadtong Sabado sa gabii diha sa Rabaya Street, Barangay Tabunok sa nahisgutang siyudad.
Ang suspetsado mao si Jun Legarto Blanco, 28-anyos, taga Spolarium Street, Barangay Duljo Fatima, Dakbayan sa Sugbo.
Si Police Captain Nazarino Emia, deputy chief sa Talisay City Police Station nagkanayon nga nasikop si Blanco gumikan sa mga tawo nga una nilang nasikop.
Matud ni Emia nga human sila nakadawat og impormasyon kabahin sa ilegal nga kalihukan ni Blanco nagpahigayon dayon sila og buy bust batok sa suspetsado.
Giingong nakuha gikan kang Blanco ang usa ka medium nga pakete ug duha ka dagkong putos sa ilegal nga drugas nga nitimbang tanan ngadto sa 55 gramos ug nagkantidad ngado sa P374,000, usa ka P1,000 nga buy bust money, usa ka cellphone ug sudlanan sa ilegal nga drugas.
Matud usab ni Emia nga giingong ang tinubdan ni Blanco sa ilegal nga drugas gikan sa prisohan susama sa ubang nadakpan sa niaging semana. (/BDB)(BANATNEWS)
- Latest