40 toneladang basura gikan sa Mahiga Creek

CEBU, Philippines — Gibana-bana nga moabot sa 40 ka toneladang basura ang nakolekta sa hiniusang paglimpyo sa mga kagamhanan sa Siyudad sa Mandaue ug Siyudad sa Sugbo sa Mahiga Creek kagahapon sa buntag.

Nagtinabangay ang duha ka Local Government Units sa pagpahigayon og massive clean up sa Mahiga Creek sanglit usa sa pagbaha kining mga nabarang basura.

Kagahapon sa buntag gipahigayon ang ceremonial start sa clean-up nila ni Mandaue City Mayor Jonas Cortes ug Cebu City Mayor Edgardo Labella diha sa Logarta bridge nga boundary sa duha ka siyudad.

Nagkanayon si Cortes nga kun magtinabangay dali rang mahuman ug makab-ot ang tinguha.

“You know ang climate change is defining issue right now it defines our present and our action, it defines our future, makita ninyo nga ato gyud gikuan gobyerno sa Mandaue ug Cebu nga we are sincere in protecting our environment, grabe na ang baha tungod sa kaning pag-abuso sa katawhan, mga basura nga makita nato nga naa sa atong kasapaan sa Mahiga so kani kita nanghinaot sa kaigsuonan sa Cebu City ug sa Mandaue nga maningkamot sad ta,” asoy  ni Cortes.

Ang Mandaue City nangusog pagpabalhin sa mga informal settlers nga namuyo kilid sa mga sapa tungod kay usa sila sa tiglabay og basura. Ang mga barangay gitahasan sab nga moangkon og dapit sa mga sapa nga sila maoy magmentinar sa kalimpyo.

Si Labella sa iyang bahin nasagmuyo sa iyang nakita nga kadaghang basura sa sapa ug gimandoan ang mga opisyales sa Barangay Mabolo nga magtinabangay sa paglimpyo sa maong dapit.

“Tan-awa ra gud ni, nigahi na, pero kini dili lang gikan ni dinhi, gikan ni ngadto sa babaw so we really have to do something, karon it’s very shocking to see this,” asoy ni Labella.

“Duna naman tay instructions sa atong mga Kapitan especially kanang naa sa mga tupad sa waterways ug sa mga creeks that there is a provision of Republic Act 9003 nga i-implement gyud na nato nga relentlessly nga sila gyud they will take charge nga ilang edukahon ang ila intawong lumolupyo. Unya naa baya’y directive atong Presidente nga kung dili na nato mahimo there are sanctions impose under R.A 9003,” dugang ni Labella. (/IBM)(BANATNEWS)