Duha gipusil, gidunggab patay

CEBU, Philippines — Patay ang usa ka computer technician human gipusil sa wala pa mailhing mamumuno sa may B. Aranas Extension, Barangay Duljo- Fatima ning Dakbayan sa Sugbo kagahapon sa kaadlawon.

Ang nakalas naila nga si Jake Aleman, 32, dunay kapuyo ug sakop sa usa ka fraternity.

Samtang ang mga mamumuno wala mailhi ug wala usab masayri kung pila ka buok.

Matud pa ni Police Staff Sergeant Nelson Solana, Desk Officer sa Mambaling Police Station blangko pa sila kung unsa ang motibo sa pagpusil sa biktima.

Base sa imbestigasyon gisulod sa mamumuno ang biktima diha sa iyang kwarto ug gipusil sa makadaghang higayon nga nakaingon sa iyang kamatayon.

Ang kapolisan nakakuha og mga basiyo sa 5.56mm nga maoy bala sa high powered firearm sama sa Armalite rifle, apan padayon pa ilang pakisusi niini.

Ang kabanay sa biktima nipadayag nga wala silay nasayran nga kontra sa biktima hinungdan wala sila magdahum nga kini patyon.  Malaumon ang mga kabanay nga masayran kung kinsa        ang nagpatay sa     biktima.

Sa laing kaso sa pagpatay, usa ka wala mailhing lalaki nga anaa sa hingkod nga pangidaron ang gidunggab sa wala mailhing mamumuno  kagabii sa Sitio Naba-Alaska, Barangay Mambaling ning dakbayan.

Ang biktima naila lang sa pangalan nga Jerry kinsa giingon nga aduna lang unta kini bisitahon sa lugar.

Ang kapulisan sa Mambaling Police Station hangtod ning pagsuwat sa balita padayon pa sa ilang imbestigasyon.

Ang biktima nakaangkon og samad dinunggaban sa ulo sulod sa usa ka payag nga maoy naingnan sa hinanali niini nga kamatayon.

Sa pagkakaron wala pay nakabutyag kung kinsa ang nihimo sa krimen ngadto sa biktima. (/IBM)(BANATNEWS)