Dalan sa NRA ilisan og pangalan nga Xiamen Street

CEBU, Philippines – Ang Dakbayan sa Sugbo mangita og dalan diha sa North Reclamation Area diin ang pangalan niini ilisan og “Xiamen Street” isip paghangop sa siyudad sa pagkamanggihatagon ug pagkamaabiabihon sa Xiamen City nga usa sa mga siyudad sa China.

Si Mayor Edgardo Labella nagkanayon nga kabahin kini sa pagpalig-on sa sister city relationship tali sa Siyudad sa Sugbo ug Xiamen nga naabot na og 35 ka tuig. Si Labella kinsa bag-o lang naabot gikan sa official trip sa China nagkanayon nga adunay mga higayon nga ang sister city relationship sa duha ka siyudad nga dili kaayo aktibo. Matud ni Labella nga 10 ngadto sa 15 ka tuig na ang nakalabay nga adunay “Cebu Street” didto sa Xiamen City.

Gikatakdang karong Oktubre 28, 2019 adunay pipila ka opisyal gikan sa Xiamen City ang mobisita sa Sugbo ug gikatakdang mohatag og duha ka fire trucks. Si Labella naglaom nga atol sa pagbisita sa mga opisyal maablihan na usab ang Xiamen Street.Gibutyag ni Labella nga ang Dakbayan sa Sugbo mopadala usab og delagasyon ngadto sa Xiamen City alang sa dugang pagtuon kabahin sa pagdumala sa operasyon sa tambalanan sa maong siyudad. Niadtong Septiyembre 7, 2019 hangtud 11, 2019 si Labella uban sa delegasyon nibisita sa Xiamen diin nitambong sila sa Silk Road Maritime International Cooperation Forum.

Atol sa maong forum si Labella adunay presentasyon diin gihisgutan ang mga development project ug gipakita usab niya ang tourist spots sa siyudad. (/BDB)(BANAT NEWS)