Labella niawhag sa kapolisan nga pabantayan ang Pasil

CEBU, Philippines – Mayor Edgardo Labella sa Dakbayan sa Sugbo subling nipahinumdum sa kapolisan nga dili molugak sa ilang operasyon batok sa ilegal nga drugas ug ubang mga klase sa kriminalidad ilabi na sa siyudad.

Kini ang tubag ni Labella human sa giingong pipila ka drugas ang nakasulod sa Sugbo gikan sa Marawi City sa Mindanao.  Matud pa ni Labella, iyang giawhag ang kapolisan ug Philippine Coast Guard nga dili lang ang mga pantalan ang tutokan apan lakip na usab ang Pasil Fish Port diin adunay mga pasahero nga modagsa gikan sa mga nagkadaiyang lugar padulong sa Probinsiya sa Bohol ug gikan sa Bohol padulong usab sa Dakbayan sa Sugbo.

Si Labella niawhag kang Cebu City Police Office director Police Colonel Gemma Cruz-Vinluan nga magbutangan og polis diha sa Pasil Fish Port nga magbantay batok sa ilegal nga drugas ug uban pang kontrabando.

Si Labella nisubli sa iyang pahinumdum atol sa nilabay nilang meeting tali sa kapolisan ug coast guard nga hatagan og pagtagad ang ubang mga lugar nga adunay posibilidad nga masudlan sa mga ilegal tungod sa kadaghan mosulod ug mogawas nga mga tawo. (/BDB)(BANAT NEWS)