P8.2 bilyon kinahanglan sa Cebu City pagsulbad sa baha

CEBU, Philippines – Gihangyo sa konseho sa Dakbayan sa Sugbo ang Regional Development Council ug Office of the Presidential Assistant for the Visayas nga mag-lobby alang sa P8.2 bilyones nga budget sa Integrated Drainage Master Plan sa siyudad.

Niadtong Martes, si Konsehal Jerry Guardo kinsa nipahigayon og privilege speech nibutyag nga nabantayan niya ang kahimtang sa sestema sa drainage sa siyudad.

Matud ni Guardo nga ang Department of Public Works and Highways-Unified Project Management Office nipadayag nga ang siyudad manginahanglan og P8.2 bilyones alang sa flood-control projects sa mga mosunod nga tuig. Sa gihimong drainage master plan niadtong tuig 1983 nakita ang 18 ka lugar sa siyudad nga bahaan.

Ug niadtong tuig 2006 nisaka ang gidaghanon sa lugar nga bahaan diin niabot na kini ngadto sa 127.

Ang DPWH adunay P740 milyones alang sa padayong programa sa pag-rehabilitate sa Mahiga Creek, Tejero River, Guadalupe River, Kinalumsan River ug Bulacao River.

Ang konseho sa siyudad mopahigayon og executive session karong umaabot Oktubre 8, 2019 tali sa Division for the Welfare of the Urban Poor, Local Housing Board ug city government diin tukion ang kabahin sa 700 ka pamilya nga maapektohan.

Ang Konseho sa Dakbayan sa Sugbo nihangyo kang Mayor Edgardo Labella nga ilakip si Association of Barangay Councils-President Franklyn Ong, representante sa non-government organization, ug chairman sa committee on infrastructure sa inter-agency task force aron tun-an ang mga solusyon sa baha sa siyudad. (/BDB)(BANAT NEWS)