Investment sa UHRI diha sa SRP himuong P25 bilyon
CEBU, Philippines – Nagkauyon ang kagamhanan sa Dakbayan sa Sugbo ug Universal Hotels and Resorts Inc. (UHRI) nga dugangan ang investment nga ibutang diha sa South Road Properties gikan sa P18 bilyones ngadto sa P25 bilyones nga Integrated Resort and Casino diha dapit sa Kawit Island.
Si City Mayor Edgardo Labella nagkanayon nga uyon siya sa rekomendasyon sa Joint Venture Selection Committee sa siyudad kinsa mao ang nakig-negotiate sa management sa UHRI sa niaging bulan.
Gibutyag ni Labella nga gihatagan niya og authority ang JVSC nga makigsabot sa mga nagdumala sa UHRI.
Gibutyag ni Atty. Jose Daluz, SRP manager nga ang siyudad buot untang usbon ang Joint Venture Agreement ug dugangan ang bahin sa siyudad imbes nga 90-10 himuon kining 60-40 gikan sa tinuig nga gross collection sa UHRI.
Si Daluz kinsa usa sa mga miyembro sa JVSC nagkanayon nga ang UHRI naghatag og counter offer nga dugangan ang puhonan gikan sa P18 bilyones ngadto sa P25 bilyones imbes nga dugangan ang bahin sa siyudad.
Ang maong tanyag sa UHRI nauyonan usab sa kagamhanan sa Dakbayan sa Sugbo. (/BDB)(BANAT NEWS)
- Latest