Sidewalk duol sa CSBT gilimpyohan

CEBU, Philippines – Gipangguba ang mga ilegal nga istruktura nga mga tindahan duol sa Cebu South Bus Terminal sa mga sakop sa Cebu City Prevention Restoration Order Beautification Enhancement (PROBE) Team.

Kini aron pagtuman sa nasudnon nga memorandum aron ibalik ang mga publiko nga mga dalan gikan sa pribadong paggamit. Gawas sa mando sa Department of Interior and Local Government, si PROBE head Raquel Arce nagkanayon nga ang siyudad nakadawat og daghang reklamo labot sa mga manindahay nga walay permit ug nagbabag sa mga sidewalk.

“Dili ako ang makasulti kun makabalik gyud ni sila kay nakadawat man ta og complaint hasta ang Office of the Mayor. Narrow man pud ang sidewalk maong atong gi-clear gyud,” matud ni Arce.

Niadtong Hulyo nipagawas ang DILG og Memorandum Circular 2019-121 nga ang tanang yunit sa lokal nga gobiyerno adunay 60 ka adlaw aron mabalik ang mga dalan gikan sa pribado nga paggamit aron moluag ang trapiko subay sa mando ni Presidente Rodrigo Duterte.

Gipasabot ni Arce nga ang iyang opisina motabang sa mga namaligya sa pagpangita og lugar nga ilang kabalhinan. Ang pagpanglimpyo sa mga istruktura gihimo kaniadtong Septiyembre 3.

Gipasabot ni Arce nga ang maong mga tindera kasagaran namaligya og mga pagkaon, accessories, gadget, ug uban pa. Dili usab sila kabahin sa mga regulated vendors nga giila sa siyudad sa niaging mga tuig.

Gihingusgan sa PROBE nga wala nay dugang mga tindera nga marehistro ug kwalipikado sa pagnegosyo sa mga sidewalk sa siyudad.

Sunod nga limpyohan sa PROBE Team ang V. Rama Avenue nga sa dili madugay ideklarar nga usa ka “discipline zone”. Sa paglingkod ni Mayor Edgardo Labella, matud ni Arce nga nalimpyo na nila ang Colon Street, Osmeña Boulevard, Magallanes Street, Manalili Street, M.L Quezon Boulevard, B. Rodriguez Street, ug uban pa. (/GMR)(BANAT NEWS)