Samsam dismayado sa basura

CEBU, Philippines – Nipagawas sa iyang kaguol ug kasagmuyo si Talisay City Mayor Gerald Anthony “Samsam” Gullas Jr. sa dihang nadunggan ang taho nga adunay mga tawo nga pabiling iresponsable sa ilang paglabay sa basura.

Una niini, si Kapitan Benjie Cabigas sa Barangay Tabunok nibutyag nga nisumbong kaniya ang ilang konstituwente sa Sitio Mananga 1 ug 2 nga adunay mga magsakyanan nga magdala og sinakong basura dayun ilabay nila sa sapa.

Sa paglingkod ni Gullas isip mayor usa sa iyang kamanduan mao ang paghimo og sinemana ug binuwan nga pagpanglimpyo sa kasapaan ug kadagatan.

Si Gullas nibutyag nga plano nila mao ang pagpalit og CCTV camera nga ibutang sa lugar aron mahibaw-an gyud kun kinsa ang mga iresponsable nga magpataka og labay sa ilang basura.

Sigun pa niya nga iya sab unya estoryahon ang engineering department kun unsa ang ilang mahatag nga rekomendasyon aron kapugngan ang susama nga binuhatan.

Gawas niana, ang pagbutang og eco-enforcers nga maoy manakop sa mga hugawan nga tawo usa sab sa iyang nahuna-hunaan.

Apan siya nihangyo sa katawhan nga tinguha lang gyud sa iyang administrasyon nga hapsay, malinawon ug limpyo nga lugar. (/GMR)(BANAT NEWS)