Pagbantay batok sa ASF gipahugtan pa
CEBU, Philippines — Gidoble pa ang gihimong monitoring karon sa African Swine Fever Task Force sa Lalawigan sa Sugbo human gikompirmar sa Department of Agriculture (DA) nga 14 ka baboy sa Rizal Province nagpositibo sa ASF.
Si Gobernador Gwendolyn Garcia niawhag sa task force nga ipabilin ang hugot nga pagpatuman sa seguridad sa tanang pantalan.
“We must now double our efforts at vigilance against the entry of pork and pork-related products this time, not just from ASF-stricken countries but also from within the Philippines. EOs 13, 13-A and 14 shall remain strictly enforced”, matud ni Garcia. Si Garcia niawhag usab sa publiko nga motabang sa pagbantay aron paglikay nga adunay makasulod nga produkto sa baboy nga walay permit nga posibleng mahimong tinubdan sa ASF.
Subay sa kompirmasyon sa DA si Garcia magpatawag og emergency meeting sa ASF task force ugma sa alas 6:00 sa gabii.
Si Dr. Mary Rose Vincoy provincial veterinarian nagkanayon nagkadaghan na usab ang mga kompaniya o sa pribadong sektor ang nisaad nga motabang sa pagsusi ug pag-monitor.
Matud ni Vincoy nga padayon ang ilang gihimong survey sa tanang kompaniya sa lalawigan nga adunay produkto sa baboy. Gibutyag ni Vincoy nga aduna sila’y nadawat nga report nga namatyan og baboy ug girespondehan dayon nila kini apan ilang nasayran nga dili ASF ang hinungdan niini.
Si agriculture secretary William Dar nitug-an kagahapon nga sa 20 ka baboy nga gikuhaan nila og blood samples ug gipadala ngadto sa United Kingdom aron sa pagsusi, 14 niini ang nagpositibo sa ASF.
Matud ni Dar nga ilang gihimo ang tanang paagi aron dili mokatap ang maong matang sa sakit ngadto sa mga baboy. (BDB) (BANATNEWS)
- Latest
