CCPO nagbutang og gender-neutral cr

CEBU, Philippines — Gibuksan na sa publiko ang mga gender-neutral nga pansayan sa Cebu City Police Stations nga nagtumong alang sa gender sensitivity bisan pa sa miyembro sa LGBTQIE+ nga komunidad.

Gawas sa duha ka pangpublikong pansayan alang sa kalalakin-an ug kababayen-an sa CCPO, laing duha ka pansayan ang gitukod nga adunay “gender-neutral” nga signage.

Ang proyekto subay kini sa adbokasiya sa CCPO nga gipangulohan ni Colonel Gemma Vinluan sa pagkasensitibo sa gender, sumala pa ni Police Major Clark Arriola, ang tigpamaba sa maogn buhatan.

“Sukad pa lang pag-abot sa atong City Director nga si Police Colonel Gemma Vinluan, usa ni sa iyang advocacy na ang atoang headquarters, atong kapolisan sa Cebu City Police Office is gender sensitive,” matud ni Arriola.

Dugang ni Arriola nga ang maong mga pansayan dili lang para sa mga sakop sa LGBTQIE+ nga komunidad apan alang usab sa mga babaye ug lalaki maong ginganlan kini og “gender-neutral comfort room.”

“Actually and atoang gender neutral doesn’t necessarily mean nga LGBTQIE+ lang na siya, ang male ug female pwede pud mosulod diri mao ng gitawag na siyang gender neutral,” matud ni Arriola.

Gawas sa pagka-sensitibo sa maong CR para sa mga LGBTQIE+ nga komunidad, ang maong CR gihimo sab nga PWD-friendly (person with disability) nga makita sa mga design niini.

“Kung nabantayan ninyo, ang atoang entrance diri is nay ramp so PWD-friendly pud ni atong CR,” dugang ni Arriola.

Ang budget nga gigamit alang sa paghimo sa mga CR, matud ni Arriola nga gikan sa mga stakeholders kinsa si Vinluan mismo ang nagita ug dili gikan sa gobiyerno.

“Actually wala ni sya gikuha from the government, ang atoang City Director is nangita siyag stakeholders outside of the government, so walay budget nga na-misalign nato for the construction of the CR,” matud ni Arriola.

Ang maong CR dili lang alang sa mga sakop sa kapolisan apan alang sa katawhan nga mobisita sa CCPO nga dunay transaksyon sama sa pagkuha og police clearance ug mobisita sa mga pamilya nila nga piniriso.

Si Arriola wala na mohatag og detalye kung pila ang saktong kantidad nga nagasto sa maong CR. (/GMR)(BANATNEWS)