Polis naputla’g bukton human sa aksidente
CEBU, Philippines – Naputlan og bukton ang 36-anyos nga polis human nalatayan og wing van cargo truck diha sa may M.C Briones Street, Barangay Basak Mandaue City niadtong Miyerkules sa gabii.
Ang naputlan sa iyang bukton mao si Police Corporal Eutiquio Soringa Jr, minyo, taga Yati Liloan ug nagmaneho sa iyang Yamaha Mio Motorcycle, samtang angkas niini ang iyang asawa nga si Mary Ann Soringa, 40.
Ang drayber sa truck kinsa kasamtangan nagtingkagol sa prisohan mao si Reynaldo Espartero, 47,taga Barangay Ticad, Bantayan Island.
Base sa initial nga imbestigasyon, parehong padung sa lungsod sa Consolacion ang trak ug ang motor apan giingong aksidente nga nawagtangan og kontrol si Soringa sa dihang nakaligis sa dili patag nga bahin sa karsada.
Matud pa nangatumba ang managtiayon ug sa pagkalukapa sa polis naligsan ang walang bukton niini sa nagsunod nga trak.Si Soringa nakaangkon ug seryoso nga kadaut sa iyang bukton, samtang ang asawa niini nakaangkon lang ug minor nga injury.
Ang managtiayon dali nga gidala sa pribado nga tambalanan sa dakbayan samtang ang drayber gitanggong alang sa dugang imbestigasyon.
Ang hepe ni Soringa nga si Police Major Franco Rodulf Oriol nangita’g pamaagi aron matabangan ang sakop. (/IBM)(BANAT NEWS)
- Latest
