Trapiko sa highway sa Naga gilaumang mahapsay

CEBU, Philippines – Gilauman nga mas hapsay na ang dagan sa mga sakyanan diha sa national highway sa Dakbayan sa Naga human nga nisaad  ang Cemex Philippines nga dili na itugot ang paglabanglabang og mga dagkong truck diha sa highway.

Atol sa tigom tali ni Gobernador Gwendolyn Garcia ug mga opisyal sa CEMEX Philippines, nisaad ang presidente sa maong kompaniya sa semento nga si Ignacio Mejares nga dili na sila mopalabang pa og mga truck sa highway atol sa peak hours.

Ang Kapitolyo mopadala usab kini og tawo diha sa maong dapit aron pagsusi kon nituman ba ang CEMEX sa saad niini.

Giawhay usab ni Garcia nga tangtangon ang concrete barriers sa kompaniya nga gibutang diha sa dalan human sa mga askidente nga nahitabo tungod kay dili makita ang maong barriers panahon sa gabii.

Ang Environmental Management Bureau (EMB) giawhag usab ni Garcia nga mosusi sa kalidad sa hangin sa maong dapit tungod sa abog.

Buot mahibaw-an ni Garcia gikan sa EMB ang hinungdan sa grabeng abog sa maong dapit.

Gikatakdang sa sunod semana magtigom og balik ang Kapitolyo ug EMB kalabot niini. (/BDB)(BANAT NEWS)