Nagduwa, nag-makeup nasakpan sa CSC

CEBU, Philippines – Pipila ka trabahante sa Cebu City Hall ang nakit-an nga nagduwa og mobile game ug nag-makeup session atol sa kinalit nga pagbisita sa mga opisyal sa Civil Service Commission niadtong Martes.

Si Commissioner Aileen Lourdes Lizada ug ubang opisyal sa CSC niduaw sa Cebu City Hall ug ubang local government units sa Sugbo.

Sa interbyu sa TV Patrol Central Visayas, si Lizada nagkanayon ila kining gihimo aron mahibaw-an kun unsang klase nga mga serbisyo ang gihatag sa mga trabahante sa gobiyerno sa ordinaryong mga lungsuranon.

“To the public, sa mga pumupunta sa government, it is high time that you assert kasi may nakita kami na may nag-de-demo pa hindi ko alam kung lotion. Tapos doon sa likod, makikita mo ang employees ng gobyerno na nagpa-sample ng makeup but the others are patiently waiting outside, holding their folders and waiting to be served,” sigun niya.

Gipasidan-an niya ang mga kawani sa gobiyerno nga dili magduwa sa online o mobile phone ug paggahin og oras sa social media sa oras sa opisina.

Tuyo sa pagsusi ni Lizada dili ang pagpakauwaw sa mga kawani kun dili ang pagseguro nga hapsay ang mga buhatan sa gobiyerno.

Matud ni Mayor Edgardo Labella nga susihon sa Human Resource Development Office ug sa City Legal Office ang maong taho.

Gipasabot ni Labella nga ang iyang administrasyon anaa pa sa transition period ug duha pa ka buwan ang nilabay alang sa iyang unang termino.

“You know, some of them may not be employees yet. They are asking for employment. No appointment yet and it’s understandable that people want to work with the city government,” sigun sa mayor.

Kon mahuman ang tanan ug ma-settle na ang transition period, giingon sa mayor nga adunay higpit nga pagpatuman sa pagsul-ob sa mga ID, uniporme ug uban pang mga lagda nga kinahanglan sa mga kawani sa gobiyerno.

Sigun ni Atty. Ariel Bacatan, assistant regional director sa CSC-7, nga ilang ihatag ang video ug photo nga nakuha ngadto sa mga opisyal sa City Hall aron sila na ang modisiplina sa maong mga kawani.

Dugang niya nga mosulod ra ang CSC kun walay buhaton ang mga concerned agencies sa mga nasakpan nga mga kawani. (/GMR)(BANAT NEWS)