Gidasmagan sa suspek, 2 polis naangol
CEBU, Philippines – Nalandig sa tambalanan ang 38-anyos nga lalaki human kini napusilan dihang nisukol sa kapolisan atol sa buy-bust operation sa may A. S. Fortuna Street, Banilad, Dakbayan sa Mandaue kagahapon sa buntag nga niresulta sab sa pagkapangos sa duha ka polis.
Ang suspek giila nga si Jason Villa, taga Barangay Capitol Site, Dakbayan sa Sugbo kinsa suway nga nieskapo ug nibunot sa iyang armas.
Nakaangkon og samad pinusilan sa iyang lawas si Villa samtang ang duha ka polis nangapangos human suway niya nga gidasmagan sa iyang sakyanan.
Nasakmit gikan kang Villa ang usa ka medium-size nga ginadili nga drugas, buy-bust money ug .38 snub nose revolver lakip ang Toyota Rav4.
Atol sa buy-bust operation sa kapolisan sa Presinto 6 sa Mandaue City Police Office, unang nasikop sila si Rosalie Abatayo ug Raul Constantine Labrador Tabanao.
Matud ni Police Major Hugo Rio Ipong, hepe sa Presinto 6 sa MCPO, nga nakasibat si Villa sakay sa usa ka sakyanan hinungdan nga nahitabo ang ginukdanay subay sa dalan A.S. Fortuna.
Giingong nihunong ang suspek ug nanaug sa sakyanan samtang bitbit sa iyang armas dayung pusil ngadto sa mga polis.
Si Villa giila nga bag-ong nakasulod sa Dakbayan sa Mandaue sa pagpamaligya og shabu. (/GMR)(BANAT NEWS)
- Latest
