Halin sa SRP giapil sa supplemental budget

CEBU, Philippines – Bisan sa mga pagsupak, ang konseho sa Dakbayan sa Sugbo nipasar sa P2.5 bilyones nga supplemental budget-2 kagahapon.

Sa 10-7-1 nga boto, ang mayoriya niaprobar sa budget ordinance sa kantidad nga P2,532,973,460 nga gipangamhanan ni Konsehal Raymond Alvin Garcia.

Ubos sa SB-2 mao ang P455 milyones alang sa mga senior citizens; P300 milyones alang sa medical equipment sa bag-ong Cebu City Medical Center; P100 milyones alang sa una, ubos ug taas nga bahin sa bag-ong building sa CCMC; P250 milyones nga digital nga sistema sa trapiko; P268 milyones alang sa pagtukod sa medium-rise building; P100 milyones sa site development; P150 milyones sa pag-abli og mga dalan ug uban pa.

Nunot niini gitakda na sa executive department ang pagpangapod-apod sa financial assistance sa mga senior citizens ug mga persons with disabilities ug uban pa.

Ang mga konsehal nga nipabor sa SB-2 mao sila si Konsehal Garcia, David Tumulak, Renato Osmeña, Jr., Joel Garganera, Antonio Cuenco, Jerry Guardo, Donaldo Hontiveros, Eduardo Rama, Jr., Prisca Niña Mabatid ug Phillip Zafra.

Si Association of Barangay Councils president Franklyn Ong way gipaboran nga habig.

Ang nisupak mao sila si Konsehal Nestor Archival, Sr., Joy Augustus Young, Eugenio Gabuya Jr., Alvin Dizon, Raul Alcoseba, Lea Japson ug presidente sa Sangguniang Kabataan Federation nga si Jessica Resch.

Gipasikad sa taga oposisyon ang ilang pagsupak sa kaso nga gisang-at ni Romulo Torres ug kanhi mayor Tomas Osmeña batok sa lakang nga gamiton ang kita sa pagbaligya sa luna sa South Road Properties.

Kini human ang SB-2 naglakip sa P2.19 bilyones gikan sa gibayad sa SM Prime Holdings, Inc. ug P333 milyones gikan sa gibayad sa Cebu Holdings, Inc.; P8 milyones nga gibalik nga pinansiyal nga tabang sa Barangay Basak San Nicolas.

Sa iyang privilege speech, matud ni Archival nga kinahanglan nga ihiklin una ang paggamit sa mga pondo hangtud ang tanang legal nga pangutana ug mga isyu kalabot sa pagbaligya sa luna sa SRP mahuman.

Apan wala kini nakapugong sa pagpabor sa mayoriya sa pagpasar sa supplemental budget. (/GMR)(BANAT NEWS)