Duha nga nagpatay sa polis patay sab

CEBU, Philippines – Gibutyag sa pangulo sa kapulisan sa Lungsod sa Minglanilla nga ang napatay sa operasyon sa kapulisan sa Lungsod sa San Fernando ug Dakbayan sa Carcar mao ang mga tawong nipusil patay kang Police Senior Master Sergeant Alfredo Pagaling niadtong miaging Sabado sa kaadlawon.

Si Police Captain June Tabigo-on nibutyag nga sila si Jessie Harold Manugas, 31, ug Jesner Fernandez, positibo nga giila sa mga nakasaksi sa pagpamusil didto sa Siyudad sa Talisay ug mismo ang ilang unang gipusil nga naka-survive.

Si Tabigo-on miingon nga sa wa pa mahitabo ang pagpusil kang Pagaling adunay pagpamusil nga nahitabo sa Talisay nga ang biktima nakalingkawas sa kamatayon human natabang ug nadala dayon sa tambalanan.

Ang biktima sa duha nga napatay, kagahapon lang nakamata ug maoy nidugang sa pagkompirmar ug mitudlo ni Fernandez nga mao ang nagpusil kaniya didto sa Talisay adtong Sabado sa kaadlawon.

Ang duha giingong mga sakop sa usa ka fraternity ug ang ilang gipusil sa Talisay City nga nalandig sa tambalanan membro sab sa karibal nilang grupo. Apan sa ilang pagsibat paingon sa habagatan nakit-an nila ang patrol car nga gisakyan ni Pagaling.

Nagtuo ang kapulisan nga ang duha naghuna-huna nga sila ang giatangan sa mga polis sa maong patrol car hinungdan nga ila kining giunhan sa pagpusil. Way swerte si Pagaling kinsa naglingkod sa driver seat kay naigo kini sa tampihak ug namatay.

Nasayran nga ang patrolcar nag-estambay sa lugar samtang nagpaabot sa ilang mga kauban alang sa himuong checkpoint sa maong dapit.

Sa operasyon kagahapon sa kapolisan, sikopon unta ang duha sa buwag nga operasyon apan giingong pulos sila nanukol sa mga operatiba maong napusilan sila ug napatay.

Si Fernandez didto napatay sa Siyudad sa Carcar. Giingong aduna kini pending nga kaso sa lain sab nga pagpamusil sa membro gihapon sa kaatbang nga fraternity.

Samtang si Manugas giingong misukol sab  sa mga polis nga modakop unta kaniya  tungod usab sa laing kasong murder. Apan sa pagsinukliay sa bala napatay si Manugas sa kapolisan.

Dugang pa ni Tabigo-on nga away sa duha ka nagkabangi nga fraternities ang hinungdan sa pagpamusil sa mga suspek apan napagan ang iyang sakop nga si Pagaling tungod niini. (/IBM)(BANAT NEWS)