Kontrata sa Carmen bulk water supply gilapas

CEBU, Philippines —  Gihatagan og 90 ka adlaw sa Kapitolyo ang Manila Water Consortium Inc. aron mopasabot sa giingong kalapasan sa Joint Investment Agreement (JIA) tali sa Probinsiya sa Sugbo niadtong 2012.

Kini may labot sa pagtukod ug pag-develop sa water supply facility alang sa treated bulk water supply gikan sa Luyang River sa Lungsod sa Carmen.

Si Atty. Marino Martinquilla, ang legal consultant sa Probinsiya sa Sugbo, nagkanayon nga lima ka kalapasan ang ilang nakita nga nahimo sa MWC. Base sa suwat ni Gobernador Gwendolyn Garcia ngadto sa chairman ug presidente sa MWC nga si Virgilio Rivera nga ang unang gitumbok nga kalapasan mao ang pag-usab sa project cost sa Capital Expenditure (CAPEX) gikan sa P702-million ngadto na sa kapin P1-billion.

Ika-duha ang pagsaka sa taripa gikan sa P13.95 matag cubic meter ngadto sa P24.59 per cubic meter; ika-tulo ang pag-ubos sa Project Internal Rate of Return (PIRR) nga makuha sa probinsiya gikan sa 19.23% ngadto na lang sa 12.30%; ika-upat ang walay remittance sa kita nga gahin sa probinsiya ug ang ika-lima mao ang pag “plow black” sa kita ngadto sa CAPEX.

Niadtong 2012 ang MWC nitanyag og unsolicited proposal diin P24.90 per cubic meter ang taripa sa tubig apan gihagit kini sa Cebu Bulk Water Resources Inc. nga nitanyag og labing ubos nga taripa nga P13.95 per cubic meter.

Apan gipaubos kini sa Swiss challenge diin ang MWC nilampos sa pagtugbang sa presyo.

Matud pa nga walay resolusyon nga gipasar ang board of directors sa JICO nga nagtugot sa gihimong kausaban. Kun dili makahatag og igong pagpasabot ang MWC, ang Kapitolyo hayan moputol sa kontrata. (GMR) (BANATNEWS)