Incentives agad sa lihok sa kapolisan
CEBU, Philippines — Gihagit ni Gobernador Gwendolyn Garcia ang kapolisan sa Probinsiya sa Sugbo nga mopakita og gilas sa ilang trabaho una siya mohatag og incentives.
Si Garcia ang dinapit sa Cebu Provincial Police Office alang sa awarding sa mga opisyal sa kapolisan sa kalampusan sa pag-ibot sa mga marijuana sa Barangay Licos, Dakbayan sa Danao niadtong Agosto 14.
“I do not wish that they will perform because of the incentive. So patan-awa usa ko og gilas, pakitaa sa ko og lihok nga maski way incentive,” matud ni Garcia. Ubos sa administrasyon ni kanhi gobernador ug karon Bise Gob. Hilario Davide III, ang Kapitolyo naghatag og dili moubos sa P3,000 nga incentives sa mga polis sa malampuson nga operasyon batok sa ilegal nga drugas.
Ang gobernador niangkon nga nawala ang iyang pagsalig sa kapolisan human sa nahitabong standoff niadtong 2012 diin ubay-ubay nga mga polis ang gibutang sa Kapitolyo atol sa iyang pagka-suspenso.
“Sa akong tanan suporta sa polis, only to have that relationship turned sour and bitter sa dihang gisuspenso ko unya ang narco-general gipadala ang polis diri aron himoon ni (Capitol) nga garrison state na hapit, nga inigka gabii dili mi katulog kay mahadlok mi nga atakihon kay naa na naglinya na ang mga SWAT naggunit sa ilang tear gas,” matud ni Garcia.
Sukad niadto matud sa gobernador nabati ang iyang pagtan-aw sa kapolisan.
Apan niadtong Pasigarbo sa Sugbo nagpasalamat si Garcia sa natabang sa kapolisan sa seguridad sa mga contingents ug sa mga nisaksi sa maong kalihukan.
“It’s a chance of redemption with this relationship. I am grateful sa ilang natabang adtong sa Pasigarbo sa Sugbo, daku sila’g balor ato, nahimo nila nga inspite of thousands of participants involved and thousands of spectator there was not a single incident reported. So that was such a wonderful manifestation of the Provincial Government and CPPO working together,” dugang sa gobernador. (GMR) (BANATNEWS)
- Latest
