Dino di angay mosulti sa BRT
CEBU, Philippines — Dili maoy tukma nga tawo nga motubag kabahin sa Cebu Bus Rapid Transit (BRT) Project si Presidential Assistant for the Visayas Michael Dino.
Kini sumala pa ni Kong. Raul del Mar human si Dino namahayag nga dunay pagputol sa rota sa BRT.
Matud ni del Mar nga sa iyang privilege speech sa hawanan sa Kongreso, iya kining gitumong sa Department of Transportation ug sa Department of Finance ug dili kang Dino.
“I did not ask him,” matud ni del Mar.
“I asked DOTr and DOF. They can answer the questions authoritatively at a hearing to be conducted by the House Committee on Transportation,” dugang ni del Mar.
Matud ni del Mar nga ang kausaban sa rota sa BRT maghukaw sa liboan ka sumasakay sa orihinal nga rota nga maoy labing nagkinahanglan sa maong matang sa transportasyon.
Gitataw ni del Mar nga ang bisan unsang kausaban sa plano moagi una kini sa ICC-NEDA Board ingon man ang kausaban sa pagpangutang og pundo nga moagi sa World Bank IBRD, Clean Technology Fund (CTF), and Agence Francaise de Developpement (AFD).
Matud ni del Mar nga dili makatubag si Dino sa iyang mga pangutanan sanglit dili siya ang tigpamaba sa DOTr kabahin niini.
Naglaum si del Mar nga maestorya niya personal si Dino kung gikinahanglan apan ang iyang gihangyo nga hearing sa House Committee on Transportation maoy iyang gipaabot nga makapatin-aw sa tanan niyang pangutana kabahin sa proyekto.
“But it is clear that we gave different positions and the future House Committee on Transportation hearing will clarify the issue and who is right,” dugang ni del Mar. (BANATNEWS)
- Latest
