BRTF umolon sa Dakbayan sa Mandaue
CEBU, Philippines — Ang kagamhanan sa Dakbayan sa Mandaue mag-umol og Barangay Rabies Task Force sa 27 ka barangay sa siyudad.
Tumong niini nga mapugngan ang pagkuyanap sa kaso sa rabies sa nahisgutang dakbayan.
Ang pag-umol sa BRTF natigayon pinaagi sa gi-aprobahan nga ordinansa nga gipangamahanan ni Konsehal Jimmy Lumapas.
Ubos sa Ordinance No. 12-2012-729 gipasabot ang kamahinungdanon sa pag-umol sa BRTF diin gitinguha nga mahimong “rabies free” ang siyudad.
Ang maong ordinansa gipahaum kini sa nasudnong balaod Republic Act 9482 o The Anti-Rabies Act of 2007 nga gitumong sa pagpanalipod sa panglawas sa tawo batok sa makamatay nga virus sa rabies.
Ang task force langkuban kini sa barangay kapitan nga magsilbing chairman uban sa iyang mga sakop nga naglakip sa barangay rabies coordinator, barangay konsehal nga maoy chairman sa committee on health, barangay konsehal nga maoy chairman sa committee on agriculture, Barangay Health Worker (BHW) ug ingon man ang hepe sa tanod.
Ang bulohaton sa BRTF mao ang pag-organize og task force sa matag sitio o matag purok, pag-andam sa listahan sa mga ngalan nga nanag-iya og binuhi nga iro, paghipos sa mga libudsuroy nga mga iro, pag-abag sa pagahimuon nga dog vaccination ug ang pagmonitor ug pagsusi sa mga panghitabo nga naglambigit sa rabies ug uban pa.
Ang BRTF makiglambigit kini sa buhatan sa city veterinarian.
Ang tumong usab sa maong ordinansa nga dili na masubli ang panghitabo diin nag-wild ang binuhing iro sa usa sa mga residente sa Barangay Casuntingan ug nakapaak kini og pipila ka molupyo lakip ang kapitan sa barangay dihang gidakop nila ang maong iro. (/BDB)(BANATNEWS)
- Latest