Del Mar magpatawag og hearing sa BRT

CEBU, Philippines – Gihangyo ni Kongresista Raul del Mar ang House Committee on Transportation nga magpatawag og hearing ug ipa-imbitar ang Department of Transportation ug National Economic and Development Authority labot sa giingong bag-ong rota sa Bus Rapid Transit (BRT) Project sa Dakbayan sa Sugbo.

Sa iyang privilege speech niadtong Martes sa Kongreso, gibutyag ni Del Mar nga ang pagputol sa hapit katunga sa rota makadaut kini sa liboan ka residente sa Bulacao ug Talamban.

Ang orihinal nga rota nga 23 kilometros naglakip sa Bulacao hangtud sa N. Bacalso Avenue hangtud sa Osmeña Boulevard hangtud sa N. Escario Street paingon sa Ayala hangtud sa Banilad-Talamban corridor tungod kay kini nga rota ang labing daghang sumasakay dihang giplano kini panahon ni kanhi mayor Tomas Osmeña niadtong 2008.

Gitaho nga ang bag-ong rota gipamub-an ngadto sa 13 kilometros nalang gikan sa South Road Properties hangtud sa IT Park. Gikwestiyon ni Del Mar ang kausaban kung aprobado ba kini sa Investment Coordinating Committee (ICC) sa NEDA Board ug kung nausab ba sab ang loan agreement. Alang kang Del Mar, ang orihinal na rota sa BRT gidesinyo kini sa gidaghanon sa mga nagpuyo, nagtrabaho ug nag-eskwela isip tubag sa problema sa trapiko sa Bulacao ug Talamban. Matud ni Del Mar nga bisan ang SRP ug IT Park mga economic powerhouse apan dili kini mga residential areas. Gawas sa pagpatawag sa hearing, gihangyo usab ni Del Mar ang komite nga magpakisayud gikan sa ICC-NEDA Board kung giuyonan ba ang pag-usab sa Cebu BRT ug pangutan-on ang Department of Finance (DoF) ug NEDA kun uyon ba sila sa kausaban lakip sa loan agreements. Kung dili pa final ang kausaban, buot ni Del Mar nga hangyoon sa komite ang DOTr nga hunahunaon usab ang desisyon niini ug ipatuman ang Cebu BRT sa orihinal nga gidesinyo. Gihangyo usab niya ang komite nga hangyoon ang DOTr nga suportahan ang alternatibong sistema sa transportasyon sa Metro Cebu nga iyang giduso. Samtang giawhag ni Cebu City Mayor Edgardo Labella ang DOTr nga ipadali ang pag-implementar ug paghuman sa BRT Project aron dili maabtan sa closing date sa 2021.

Kini human ang Commission on Audit nipagawas og report nga moabot na sa P22.9 milyones ang commitment fees nga bayran sa gobiyerno sa kalangan sa proyekto sulod na sa upat ka tuig. (Jean Marvette A. Demecillo/GMR)(BANAT NEWS)