Tulo ka andana sa CCMC magamit na sunod tuig
CEBU, Philippines – Ang tulo ka andana sa bag-ong Cebu City Medical Center nga adunay 100-bed capacity ang giingong magamit na sa dili pa ang pagsaulog sa charter day sa Dakbayan sa Sugbo sa buwan sa Pebrero sa sunod tuig.
Gipadayag kini atol sa budget hearing kagahapon sa gisugyot nga P2.5 bilyones nga Supplemental Budget-2 nga naglakip sa P300 milyones nga pagpalit og mga kagamitan alang sa medical ug P100 milyones alang sa pagkompleto sa lower ground, upper ground, ug ikaduhang andana sa maong tambalanan.
“Most of our major hospital equipment are old and some are unserviceable. So, we need to request to buy state-of-the-art machines which we don’t have as early as now in preparation for our transfer to the new building considering the length of time the bidding and procurement processes are completed”, matud ni Yvonne Feliciano, CCMC hospital administrator.
Si Feliciano nagkanayon nga P300 milyones ang gamiton sa pagpalit sa Magnetic Resonance Imaging (MRI), Digital Cardiac Monitoring, electric stretcher, CT-Scan ug digital stretcher.
Si Konsehal Alvin Dizon nipadayag sa iyang suporta sa maong plano ni Feliciano.
Matud ni Dizon nga ang siyudad kinahanglan usab kining maggahin og budget alang sa pagmentinar sa mga ekipo aron dili mausik ang kwarta gikan sa panudlanan sa siyudad.
Si Feliciano sa iyang bahin, nagkanayon nga ang mga personnel sa tambalanan bansayon usab kini sa paggamit sa mga ekipo. Si City Engineer Kenneth Carmelita Enriquez nagkanayon nga ang phase 2 mahuman sa Nobiyembre karong tuiga. (/BDB)(BANAT NEWS)
- Latest