BRT alignment gikwestiyon sa konseho

CEBU, Philippines — Gikwestiyon sa mga sakop sa konseho sa Siyudad sa Sugbo ang bag-ong alignment sa P16.7 bilyones nga Cebu Bus Rapid Transit Project.

Sila si Bise Mayor Michael Rama ug Konsehal Nestor Archival, Alvin Dizon, Franklyn Ong ug uban pa ang nipadangat sa ilang mga pangutana ngadto sa consultant sa proyekto atol sa niaging sesyon.

Matud ni Rama nga sukad sa pagsugod daghan na kaayong giusab sa plano ingon man ang budget sa proyekto.

Matud ni Archival nga ang orihinal nga rota nga 23 kilometros naglakip sa Bulacao hangtud sa N. Bacalso paingon sa Osmeña Boulevard hangtud sa N. Escario Street paingon sa Ayala hangtud sa Banilad-Talamban corridor atol sa administrasyon ni kanhi mayor Tomas Osmeña niadtong 2008.

Ang rota giingong gipamub-an kini ngadto nalang sa 13 kilometros gikan sa South Road Properties hangtud sa I.T. Park. Gani si Osmeña nagpadala og sulat sa Investment Coordination Committee sa National Economic and Development Authority (NEDA) bahin sa bag-ong rota sa BRT.

Apan si Milana Suarez, espesyalista sa pagplano ug pagdesinyo sa EGIS International nga mao ang Technical Support Consultant sa BRT, niklaro nga ang pag-align wala mausab. Gihimakak ni Suarez nga ang bag-ong alignment gipamub-an gikan sa 23 kilometros ngadto sa 13 ka kilometros.

Dugang pa niya nga ang rota sa BRT mas gipatas-an pa gikan sa 23 kilometros hangtud 34 kilometros.

Ang mga feeders maglakip sa Mambaling hangtud sa Bulacao hangtud sa Talisay City ug laing serbisyo sa feeder gikan sa I.T. Park sa Banilad-Talamban corridor diin pinasubay usab kini sa PUV modernization.

Hinoon ang iya sa BRT mao lang ang gikan sa SRP hangtud sa I.T. Park tungod sa kabalaka nga daghang maapektuhan nga proyekto.

Matud ni Suarez nga pangandam kini sa unsa mang pamaagi sa transportasyon nga sagopon sa Metro Cebu hangtud sa 2050. Sigun ni Randolph Carreon, expert sa transportasyon sa EGIS, nga ang BRT magsugod sa pagtukod sa tuig 2020 ug sa partial operability sa Disyembre 2021. (/GMR)(BANATNEWS)