P1.2 milyong shabu nasakmit, 17 nasikop

CEBU, Philippines — Dul-an sa tunga sa milyon ka pesos nga balor sa drugas ang nasakmit sa duha ka hiniusang operasyon sa mga sakop sa Philippine Drug Enforcement Agency ug kapolisan sa Dakbayan sa Sugbo niadtong Sabado diin lima ka tawo ang nasikop.

Unang operasyon nahitabo ala 1:30 sa hapon sa may N. Bacalso Avenue, Poblacion Pardo diin nasikop ang duha ka high-value target nga sila si Jun Daculan, 42, ug Jonathan Ochia, 44, pulos taga Barangay Inayawan.

Nasakmit gikan sa mga dinakpan ang 50 gramos sa gituohang shabu nga mobalor og P340 mil ug duha ka cellphones.

Ikaduhang operasyon nahitabo alas 10 sa gabii sa may Sitio Mahayahay, A. Lopez Street, Calamba nga gikasikop nila ni Antonia Jaca, Jean Flores ug Donald Soco.

Nasakmit gikan kanila ang lima ka putos sa gituohang shabu nga mobalor og P170 mil ug cellphone.

Samtang mokabat sab sa P400,000 mga kantidad sa shabu ang nasakmit sa managlahing buy-bust operation sa kapolisan sa Dakbayan sa Danao ug Dakbayan sa Lapu-Lapu diin usa ang nakaeskapo.

Si Police Major Juan Capacio sa City Intelligence Branch sa Lapu-Lapu City Police Office maoy nangulo sa operasyon sa Sitio Hawaian, Marigondon diin nadakpan si Eric James Tuyoga, 18, taga Barangay Mambaling, Dakbayan sa Sugbo.

Dugang nadakpan mao sila si John Paul Navarra, 19, taga Banilad, Dakbayan sa Sugbo, Ijay Kent Barrios, 25; Chelon Macapaz, 19, ug Jenah Dave Dayday, 19, pulos nagpuyo sa maong dapit.

Ang laing kauban sa mga dinakpan nga si John Michael Sanchez, 24, nagpuyo sa maong dapit nga mao unta ang target sa operasyon ang nakadagan.

Samtang si Police Lieutenant Maribel Getigan, hepe sa Danao City Police Station, ang nagpahigayon sab og buy-bust operation sa duha ka sitio sa Barangay Poblacion hinungdan sa pagkasikop sa 10 ka pusher ug nasakmit ang mokabat sa P300,000 nga kantidad sa shabu.

Giila ni Getigan ang mga nadakpan nga sila si Van John Lao, 24; Elvie Enriquez, 21, ug Vincent John Apor, 22, taga dalan F. Ralota, Poblacion, Dakbayan sa Danao.

Laing nadakpan sa Sitio Cambiohan mao sila si Argel Dagatan, 28, ug Ranil Jacquez, 41, pulos nagpuyo sa maong dapit.

Nadakpan usab sila si Renato Duterte III, 42, ug Jeva Duterte, 39, pulos taga El Cantorio,  Barangay Looc sa mao gihapong dakbayan ug mokabat sa P82,000 kapin nga kantidad sa shabu ang nasakmit sa kapolisan. (Romeo T. Limpangog/GMR)(BANATNEWS)