Mga estraktura sa Tabunok nga nilapas gipangguba

CEBU, Philippines — Nikabat sa 20 ka estraktura diha sa sidewalk nga nagpalibot sa flyover sa Barangay Tabunok, Dakbayan sa Talisay ang gipangguba atol sa gihimong clearing operation sa City of Talisay-Traffic Operation Development Authority (CT-TODA), Clearing Division, kapolisan sa siyudad ug opisyales sa barangay.

Gawas niini, duha ka motorsiklo ug tulo ka tangkal-tangkal nga nakababag diha sa karsada duol sa merkado sa Tabunok ang gipangsakmit usab atol sa maong clearing operation.

Si Jonathan “Joy” Tumulak, hepe sa CT-TODA nagkanayon nga aduna pay laing mga estraktura nga nilapas diha sa agianan ang wala pa maguba. Ang mga tag-iya sa maong estraktura gihatagan og higayon nga maoy boluntaryong moguba niini.

Matud ni Tumulak nga ang maong mga estraktura nga wala pa maguba mga konkreto kini hinungdan nga ilang gihangyo ang City Legal Office sa pagpadala og suwat sa mga tag-iya niini aron pahibaw-on sa ilang kalapasan.

Gibutyag ni Tumulak nga sa sunod semana himuon na gyud nila ang pagguba sa mga estraktura nga nakalapas diha sa karsada kun pakyas gihapon ang mga tag-iya niini sa pagsunod sa kamanduan.

Matud usab ni Tumulak nga ubay-ubay usab ang ilang mga nasita nga sakyanan kinsa padayon gihapon nga nagpataka og parking.

Ug ang ubang mga sakyanan ilahang gipangdala tungod kay walay drayber nga nikuha niini. (/BDB)(BANATNEWS)