P1.3 milyong shabu, 2 HVT nasikop

CEBU, Philippines — Duha ka high value targets (HVT) ug duha nila ka kauban ang nangasikop sa gipahigayon nga buy bust operation sa kapolisan diha sa Barangay San Isidro, Dakbayan sa Talisay kagahapon sa kaadlawon.

Ang subject sa operasyon mao si Mark Manuel Deiparine, nagpuyo sa maong lugar. Naila si Deiparine nga dakong player sa ilegal nga drugas human siya malista sa regional drug watchlist.

Ang lain nga nasikop mao sila si Justine Aparece, taga C. Padilla St. sa Barangay San Nicolas, Siyudad sa Sugbo. Nalista sab si Aparece isip HVT sa probinsya sa Sugbo.

Ang duha nila ka kauban nga naapil sa pagkasikop mao sila Alvin Mercado, ug si Anthony Manilag, pulos nagpuyo sa nahisgutang lugar.

Ang grupo nila ni Police Captain Nazarino Emia, deputy chief sa Talisay City Police Station maoy nihimo sa operasyon human sa sunod-sunod nga impormasyon nga ilang nadawat labot sa ilegal nga kalihukan ni Deiparine.

Ang mga nasakmit nga shabu gipangsud sa usa ka plastik sa tsitseriya sa tinguha unta nga dili kini mabantayan apan sa gihapon wala kini makalusot sa kapolisan. Ang nakuhang gituohang shabu may gibug-atong 185.12 gramos nga gibana-banang balor P1.2 milyones.

Sa laing operasyon, tulo ka durugista ang nasikop sa gihimong buy bust operation didto sa Barangay Tabunok kagahapon sa alas 2:20 sa kaadlawon.

Ang mga dinakpan nga pulos na naa sa listahan sa kapulisan nga mamaligya og ilegal nga drugas mao sila si Cris Wilfred Laspona, 21, taga Sitio Kasagingan, Brgy. Lawaan 3; Andel Alingalan Cabo, 44, taga Sitio Luna, Brgy. Lagtang ug si Diselon Romeral Corbeta, 34, taga Sitio Kasagingan, Brgy. Lawaan 3.

Matud pa ni Emia resulta ang operasyon sa pagtabang sa katawhan nga maoy naghatag og impormasyon labot sa ilang ilegal nga kalihukan.

Nakuha gikan kanila ang 25.10 gramos nga  gituohang shabu nga gibana-banang balor P170,680.

Ang tanang nadakpan gikatakdang pasakaan og kaso ugmang adlawa. (/IBM)(BANATNEWS)