TNVS nihangyo sa LTFRB nga mahatagan og dugang PA

CEBU, Philippines – Gitigom sa Land Transportation Franchising and Regulatory Board (LTFRB) ang mga operator sa taxi, pasahero aron matuki ang hangyo sa mga drayber sa Transport Network Vehicle Service (TNVS) nga padugangan ang mahatagan og Provisional Authority (PA).

Si Eduardo Montealto, Jr., direktor sa LTFRB-7 nagkanayon nga subay sa hangyo sa mga drayber sa TNVS ilang gihimo ang panagtigom aron kuhaon usab ang sentimento sa nagkalainlaing sektor.

Nasayran nga ang Department of Transportation (DOTr) nitagana lang og 1,500 ka PA sa Sugbo apan ang gidaghanon sa TNVS nga nagdagan karong panahona nikabat na sa 2,000 ngadto sa 3,000.

Una niini, ang nagkalainlaing grupo nanawagan kang Presidente Rodrigo Duterte nga dunggon ang ilang hangyo tungod kay nakahinayak na sila og kuha og unit alang sa pagpamasahero aron ibuhi sa ilang pamilya.

Si Ernesto Aniban nga sakop sa Alsa Boys nagkanayon nga maglisud siya og bayad sa iyang gikuha nga sakyanan kong dili siya mahatagan og PA ug ang iyang pamasada mao usab ang gisaligan niya sa pagsuporta sa iyang pamilya.

Si Rusty Ybiernas, taxi operator sa RDHL taxi nagkanayon nga wala siyay supak sa TNVS tungod kay gisusama niya kini sa taxi.

Apan ang iyang gikagul-an mao ang mga nitumaw nga bus nga mohatag og libreng sakay sa mga pasahero.

Samtang si Shirley Mara, pasahero sa TNVS nipadayag nga dako og tabang kaniya ang TNVS tungod sa kasayon ug komportable nila nga mosakay ug masiguro usab niya ang iyang seguridad ug sa iyang pamilya.

Sa iyang bahin, Si Montealto nagkanayon nga gihatagan og higayon ang matag sektor sa pagpasabot sa ilang sentimento aron ilaha usab nga matimbang-timbang ug mapadangat usab niya ngadto sa ulohan nila nga buhatan ang mga sentimento. (/BDB)(BANAT NEWS)